ការវាយតម្លៃសិទ្ធិមនុស្សប្រចាំឆ្នាំរបស់ក្រសួងការបរទេសសហរដ្ឋអាមេរិក បានលើកឡើងពីការរំលោភបំពាន «យ៉ាងខ្លាំងក្លា» នៅរដ្ឋ Manipur ភាគឦសានរបស់ប្រទេសឥណ្ឌា កាលពីឆ្នាំមុន និងការវាយប្រហារលើជនជាតិភាគតិច អ្នកសារព័ត៌មាន និងសំឡេងប្រឆាំង នៅកន្លែងផ្សេងទៀតរបស់ប្រទេស។
រដ្ឋ Manipur បានកើតមាននូវការប្រយុទ្ធគ្នាយ៉ាងខ្លាំងក្លា រវាងកុលសម្ព័ន្ធ Kuki-Zo និងប្រជាជនភាគច្រើន Meitei បន្ទាប់ពីដីការបស់តុលាការ កាលពី ១ឆ្នាំមុន បានលើកឡើងពីការពង្រីកបុព្វសិទ្ធិរបស់ជនជាតិភាគតិច Kuki។ ជម្លោះនោះ បានសម្លាប់មនុស្សជាង ២០០នាក់។
របាយការណ៍របស់ក្រសួងការបរទេសអាមេរិក បានឲ្យដឹងថា មនុស្សជាង ៦០.០០០នាក់ ត្រូវផ្លាស់ទីលំនៅ ចន្លោះខែឧសភា ដល់ខែវិច្ឆិកា នៅរដ្ឋ Manipur។ ពាក់ព័ន្ធនឹងរបាយការណ៍នេះ មិនទាន់មានការអត្ថាធិប្បាយភ្លាមៗនៅឡើយទេពីស្ថានទូតឥណ្ឌាប្រចាំនៅក្រុងវ៉ាស៊ីនតោន។
នៅកន្លែងផ្សេងទៀតរបស់ឥណ្ឌា ក្រសួងការបរទេសបានរាយការណ៍ពី «ករណីជាច្រើន» ដែលរដ្ឋាភិបាល និងសម្ព័ន្ធមិត្តរបស់ខ្លួន «បានចោទប្រកាន់ថា បានគាបសង្កត់ ឬរំខានដល់ប្រព័ន្ធផ្សព្វផ្សាយដែលរិះគន់រដ្ឋាភិបាល»។ ជាឧទាហរណ៍ នាយកដ្ឋានពន្ធលើប្រាក់ចំណូលបានត្រួតពិនិត្យការិយាល័យរបស់សារព័ត៌មាន BBC កាលពីដើមឆ្នាំ២០២៣ បន្ទាប់ពីសារព័ត៌មាននេះបានចេញផ្សាយឯកសាររិះគន់នាយករដ្ឋមន្ត្រីជាតិនិយមហិណ្ឌូ លោក Narendra Modi។ តែរដ្ឋាភិបាលឥណ្ឌា បានប្រាប់ថា នៅពេលនោះការត្រួតពិនិត្យនេះមិនមែនជាការសងសឹកនោះទេ។
ការវាយតម្លៃរបស់សហរដ្ឋអាមេរិកបានឲ្យដឹងថា ក្រុមអ្នកកាន់សាសនាតូចៗ នៅក្នុងប្រទេសឥណ្ឌា បានរាយការណ៍ពីការរើសអើង ក្នុងនោះរួមទាំងការអំពាវនាវឲ្យប្រើអំពើហិង្សា និងផ្សព្វផ្សាយព័ត៌មានមិនពិតផងដែរ។លោក Modi ដែលមានសិទ្ធិខ្ពស់ក្នុងការឈ្នះអាណត្តិទី៣ ពោលគឺស្មើនឹងកំណត់ត្រានៅក្នុងការបោះឆ្នោតមួយដែលដំណើរការរហូតដល់ថ្ងៃទី១ ខែមិថុនា បានបដិសេធពីការបំពានលើជនជាតិភាគតិច ហើយនិយាយថា គោលនយោបាយរបស់លោកមានគោលបំណងផ្តល់ផលប្រយោជន៍ដល់ប្រជាជនឥណ្ឌាទាំងអស់គ្រប់ជាន់ថ្នាក់៕