ប្រទេសចិន នៅថ្ងៃអង្គារ (ទី២៣ ខែមេសា) បានចេញការព្រមានអំពីព្យុះភ្លៀងពណ៌ក្រហម ដែលជាកម្រិតខ្លាំងបំផុតរបស់ខ្លួន សម្រាប់ផ្នែកខ្លះនៃខេត្ត Guangdong (ក្វាងទុង) ខណៈដែលភាគខាងត្បូងខេត្តនេះត្រូវបានជួបប្រទះនឹងភ្លៀងធ្លាក់ខ្លាំង។
ការរិយាល័យឧតុនិយមរបស់ទីក្រុង Shenzhen បានឲ្យដឹងថា ទីក្រុងនេះស្ថិតក្នុងចំណោមតំបន់ដែលត្រូវបានដាក់ក្នុងបញ្ជីថា ជាតំបន់មាន «ភ្លៀងធ្លាក់ពីខ្លាំងរហូតដល់ខ្លាំងបំផុត» ដោយបន្ថែមថា ហានិភ័យពីការមានទឹកជំនន់យ៉ាងគំហុកភ្លាមៗ គឺ «ខ្ពស់ណាស់»។
ភ្លៀងធ្លាក់ខ្លាំងបានកើតមាននៅតំបន់ដ៏ធំនៃភាគខាងត្បូងខេត្តក្វាងទុង ក្នុងរយៈពេលប៉ុន្មានថ្ងៃថ្មីៗនេះ ដោយទឹកទន្លេឡើងខ្ពស់ ហើយធ្វើឲ្យមានការភ័យខ្លាចកាន់តែខ្លាំងអំពីការមានទឹកជំនន់ធំ ដែលប្រព័ន្ធផ្សព្វផ្សាយរដ្ឋ បានលើកឡើងថា អាចជាប្រភេទ «ដែលត្រូវបានឃើញតែម្ដងប៉ុណ្ណោះ ក្នុងមួយសតវត្សរ៍»។
ទីភ្នាក់ងារព័ត៌មានរដ្ឋ Xinhua បានរាយការណ៍ថា អ្នកស្រុកក្វាងទុង ១១០.០០០នាក់ ត្រូវចាកចេញពីទីលំនៅ ចាប់តាំងពីភ្លៀងធ្លាក់ចាប់ផ្តើមមានកាលពីចុងសប្តាហ៍។ ជាមួយគ្នានេះ សារព័ត៌មាន Xinhua ឲ្យដឹងទៀតថា មនុស្ស ៤នាក់ បានស្លាប់ ខណៈដែល ១០នាក់ បាត់ខ្លួន។
គួរបញ្ជាក់ថា ប្រទេសចិនមិនមានអ្វីប្លែកនោះទេក្នុងការជួបប្រទះអាកាសធាតុអាក្រក់ខ្លាំងបំផុត ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ បានកើតមាននូវគ្រោះទឹកជំនន់ធ្ងន់ធ្ងរ គ្រោះរាំងស្ងួត និងកម្ដៅហួតហែង៕