ការិយាល័យក្រសួងយុត្តិធម៌ និងនគរបាលជាតិរបស់ប្រទេសអេក្វាឌ័រ កាលពីថ្ងៃចន្ទ (ទី២២ ខែមេសា) បាននិយាយថា ពួកគេចាប់បានមកវិញនូវបុគ្គលដែលត្រូវបានចោទប្រកាន់យ៉ាងល្បីសុសសាយថា ជាមេក្រុមជនអន្ធពាល Los Lobos គឺលោក Fabricio Colon Pico Suarez (Pico) ដែលបានរត់គេចខ្លួនពីពន្ធនាគារ កាលពីខែមករា។

លោក Pico ដែលត្រូវបានចោទប្រកាន់ពីបទរៀបចំផែនការវាយប្រហារលើរដ្ឋមន្ត្រីក្រសួងយុត្តិធម៌ ក្នុងចំណោមអំពើឧក្រិដ្ឋកម្មផ្សេងទៀតនោះ បានរត់គេចខ្លួនពីពន្ធនាគារ ក្នុងទីក្រុង Riobamba ចំពេលមានរលកនៃអំពើហិង្សានៅទូទាំងប្រទេសអេក្វាឌ័រ ដែលរួមមានការសម្រុកចូលស្ថានីយទូរទស្សន៍ពេលផ្សាយផ្ទាល់ដោយខ្មាន់កាំភ្លើងប្រដាប់ដោយអាវុធផងដែរ។ 

នគរបាលបានប្រាប់ថា ជនជាប់ចោទរូបនេះត្រូវបានចាប់ខ្លួនមកវិញនៅទីក្រុង Puerto Quito ក្នុងខេត្ត Pichincha។ ហើយបើយោងតាមអាជ្ញាធរ បានឲ្យដឹងថា លោក Pico ដែលមានឈ្មោះហៅក្រៅក្នុងអំពើឧក្រិដ្ឋ គឺ Captain Pico (កាពីតែន Pico) ត្រូវបានចុះក្នុងបញ្ជីឧក្រិដ្ឋជនដែលត្រូវការខ្លួនបំផុត ក្នុងប្រទេស។

ក្នុងសន្និសីទសារព័ត៌មានមួយ នៅថ្ងៃចន្ទនោះ មន្ត្រីបានប្រាប់ឲ្យដឹងថា មនុស្ស ២នាក់ទៀត ដែលបានរត់គេចខ្លួនជាមួយលោក Pico ត្រូវបានឃុំខ្លួនក្នុងពេលតែមួយដែរ៕