អាមេរិក៖ ក្រុមអាជ្ញាធរសហរដ្ឋអាមេរិកបានលើកឡើងកាលពីថ្ងៃអង្គារ ទី២៧ ខែកក្កដាថា ពលរដ្ឋអាមេរិកដែលបានចាក់វ៉ាក់សាំងប្រឆាំងនឹងវីរុស COVID-19 គ្រប់ដូសរួចហើយ គួរត្រលប់ទៅរកការពាក់ម៉ាស់ឡើងវិញនៅតាមទីសាធារណៈនានា ក្នុងតំបន់ដែលមានករណីឆ្លងវីរុសកូរ៉ូណាខ្លាំង និងជាពិសេសវីរុសបម្លែងខ្លួនថ្មី Delta ដែលកំពុងឆ្លងរាលដាលយ៉ាងឆាប់រហ័ស។
មជ្ឈមណ្ឌលគ្រប់គ្រង និងបង្ការជំងឺឆ្លងសហរដ្ឋអាមេរិក (CDC) ក៏បានណែនាំឱ្យសិស្ស និងគ្រូទាំងអស់ចាប់ពីថ្នាក់មត្តេយ្យដល់ថ្នាក់ទី១២ ពាក់ម៉ាស់ដោយមិនគិតពីស្ថានភាពចាក់វ៉ាក់សាំង។ CDC បាននិយាយថា កុមារគួរតែត្រឡប់ទៅរៀនពេញម៉ោង និងរៀនសូត្រដោយផ្ទាល់ក្នុងរដូវស្លឹកឈើជ្រុះដោយមានយុទ្ធសាស្ត្រការពារត្រឹមត្រូវ។ ការផ្លាស់ប្ដូរនេះគឺជាការផ្ទុយស្រឡះពីសេចក្តីប្រកាសរបស់ CDC កាលពីខែឧសភា ដែលបានជំរុញឱ្យពលរដ្ឋអាមេរិករាប់លាននាក់ ដែលបានចាក់វ៉ាក់សាំងរួចដោះម៉ាស់ចេញ។ សហរដ្ឋអាមេរិកនាំមុខពិភពលោកក្នុងចំនួនករណីឆ្លងថ្មី ជាមធ្យមប្រចាំថ្ងៃដែលមានមួយក្នុងចំណោម ៩ករណីឆ្លងដែលបានរាយការណ៍ទូទាំងពិភពលោកក្នុងមួយថ្ងៃ។
ជាមធ្យមរយៈពេល ៧ថ្ងៃសម្រាប់ករណីឆ្លងថ្មីបានកើនឡើងយ៉ាងខ្លាំងរហូតដល់ចំនួន ៥៧.១២៦នាក់នៅតែប្រហែលមួយភាគបួននៃកម្រិតឆ្លងខ្ពស់បំផុតនៃជំងឺរាតត្បាតសកលនេះ។ គិតត្រឹមព្រឹកថ្ងៃពុធនេះ សហរដ្ឋអាមេរិកមានករណីឆ្លងចំនួន ៣៥,៣៤២,៧៥០នាក់ បន្ទាប់ពីមានករណីឆ្លងថ្មី ៥២,១១១នាក់ និងអ្នកស្លាប់ចំនួន ៦២៧,៣៧៩នាក់ បន្ទាប់ពីមានករណីស្លាប់ថ្មីចំនួន ៣០៩នាក់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
