មន្ត្រីគណបក្សប្រជាធិបតេយ្យនៃការតស៊ូ (PDIP) នៅថ្ងៃអង្គារ (ទី២៣ ខែមេសា) នេះ បានឲ្យដឹងថា ប្រធានាធិបតីឥណ្ឌូនេស៊ី លោក Joko Widodo និងកូនប្រុសរបស់លោក គឺលោក Gibran Rakabuming Raka ដែលនឹងចូលកាន់តំណែងអនុប្រធានាធិបតី លែងជាសមាជិករបស់គណបក្សដ៏ធំបំផុតរបស់ប្រទេសនេះទៀតហើយ ក្រោយពួកគេបានគាំទ្របេក្ខជនគូប្រជែង និងជាអ្នកឈ្នះការបោះឆ្នោត គឺលោក Prabowo Subianto។

ជាមួយនឹងការចាកចេញរបស់ពួកគេនេះ ក្រសែភ្នែកទាំងអស់នឹងត្របាញ់ឆ្ពោះទៅកាន់ជំហានបន្ទាប់របស់លោក Jokowi ដ៏មានប្រជាប្រិយ ខណៈដែលការគាំទ្ររបស់ប្រធានាធិបតីជិតផុតអាណត្តិរូបនេះ ចំពោះរដ្ឋមន្ត្រីការពារជាតិលោក Prabowo ត្រូវបានគេមើលឃើញយ៉ាងច្បាស់ និងត្រូវបានបកស្រាយយ៉ាងទូលំទូលាយថា ជាវិធីដើម្បីរក្សាឥទ្ធិពលនយោបាយ និងរក្សាកេរ្តិ៍ដំណែលរបស់លោក បន្ទាប់ពីកាន់តំណែង ១ទសវត្សរ៍។

លោក Komarudin Watubun ដែលជាប្រធានផ្នែកសីលធម៌របស់គណបក្ស PDIP បាននិយាយថា លោក Widodo និងលោក Gibran មិនត្រូវបានបណ្តេញចេញនោះទេ ប៉ុន្តែបានបញ្ចប់ភាពជាសមាជិក នៅពេលដែលពួកគេសម្រេចចិត្តមិនគាំទ្របេក្ខជនប្រធានាធិបតី លោក Ganjar Pranowo របស់គណបក្ស PDIP។

ដោយមានជំនួយពីការគាំទ្រយ៉ាងស្ងាត់ៗរបស់លោក Widodo និងដោយមានលោក Gibran ជាមិត្តរួមតំណែង លោក Prabowo បានទទួលជ័យជម្នះយ៉ាងធំធេង នៅក្នុងការបោះឆ្នោតថ្ងៃទី១៤ ខែកុម្ភៈ ដោយទទួលបានសំឡេងឆ្នោតគាំទ្រ ៥៨ភាគរយ ធៀបនឹងចំនួន ១៦ភាគរយរបស់លោក Ganjar។

លោក Komaruddin បានប្រាប់សារព័ត៌មាន Reuters ថា៖ «ពួកគេបានសម្រេចចិត្តនៅខាងគណបក្សប្រឆាំង»។ លោកបានបញ្ជាក់បន្ថែមថា៖ «ដោយមិនគិតពីអ្វីដែលបានកើតឡើង លោក Jokowi បានឈានដល់កម្រិតខ្ពស់បំផុតនៅក្នុងគណបក្ស សម្រាប់អាជីពនយោបាយរបស់លោក។ លោកបានក្លាយជាប្រធានាធិបតី។ ដូច្នេះ យើងចង់រក្សាឧត្តមភាពរបស់គាត់»។

ពាក់ព័ន្ធនឹងករណីនេះ ការិយាល័យប្រធានាធិបតីមិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ។ គួរបញ្ជាក់ថា លោក Widodo បានចូលរួមជាមួយគណបក្ស PDIP ក្នុងឆ្នាំ២០០៤ ដើម្បីឈរឈ្មោះជាអភិបាលក្រុង Surakarta ហើយឈ្នះបាន ២អាណត្តិ។ ក្រោយមក រូបលោកត្រូវបានជ្រើសរើសជាអភិបាលក្រុងហ្សាការតា ហើយបានក្លាយជាប្រធានាធិបតី ២អាណត្តិ ដោយមានការគាំទ្រពីគណបក្ស PDIP ។ ចំណែកលោក Gibran ក៏បានធ្វើតួនាទីជាអភិបាលក្រុង Surakarta ចាប់តាំងពីឆ្នាំ២០២០៕