ប្រទេសចិន នៅថ្ងៃអង្គារ (២៣ មេសា) នេះ បានចោទប្រកាន់សហរដ្ឋអាមេរិកថា បានធ្វើការអះអាង «ដោយគ្មានមូលដ្ឋាន» ដែលថា ខ្លួនកំពុងជួយដល់កិច្ចខិតខំប្រឹងប្រែងធ្វើសង្គ្រាមរបស់រុស្ស៊ី នៅអ៊ុយក្រែន។

ការកត់សម្គាល់បែបនេះ បានកើតមានឡើងបន្ទាប់ពីរដ្ឋមន្ត្រីការបរទេសអាមេរិក លោក Antony Blinken កាលពីថ្ងៃសុក្រសប្តាហ៍មុន បានរិះគន់ការគាំទ្ររបស់ចិនដល់ឧស្សាហកម្មការពារជាតិរបស់រុស្ស៊ី ដោយនិយាយថា ទីក្រុងប៉េកាំង គឺជាអ្នករួមចំណែកដ៏ធំ ក្នុងសង្គ្រាមរបស់ទីក្រុងមូស្គូ នៅប្រទេសអ៊ុយក្រែន តាមរយៈការផ្តល់ធាតុផ្សំសំខាន់ៗ សម្រាប់អាវុធយុទ្ធភណ្ឌ។

អំឡុងសន្និសីទប្រចាំថ្ងៃ នៅទីក្រុងប៉េកាំង អ្នកនាំពាក្យក្រសួងការបរទេសចិន លោក Wang Wenbin បាននិយាយថា៖ «ប្រទេសចិនមិនមែនជាឧក្រិដ្ឋជននៃវិបត្តិនៅអ៊ុយក្រែននោះទេ។ យើងមិនដែលចាក់សាំងលើភ្លើងនោះឡើយ ហើយក៏មិនឆ្លៀតឱកាសកេងចំណេញ ហើយក៏មិនទទួលយកការស្តីបន្ទោសដែរ»។

គួរបញ្ជាក់ថា លោក Blinken គ្រោងនឹងធ្វើទស្សនកិច្ចទៅកាន់ប្រទេសចិន ចាប់ពីថ្ងៃពុធ (២៤ មេសា) ដើម្បីពិភាក្សាពីបញ្ហាជាច្រើន ក្នុងនោះរួមទាំងបញ្ហាវិបត្តិ នៅតំបន់មជ្ឈិមបូព៌ា សង្គ្រាមរុស្ស៊ី-អ៊ុយក្រែន និងភាពតានតឹង នៅសមុទ្រចិនខាងត្បូងផងដែរ៕