អាជ្ញាធរក្នុងតំបន់ បានឲ្យដឹងថា មនុស្ស ៥នាក់ ក្នុងរួមទាំងកុមារម្នាក់ផងដែរ បានស្លាប់ អំឡុងពេលប៉ុនប៉ងឆ្លងកាត់ផ្លូវទឹកអង់គ្លេសដោយធ្វើដំណើរពីប្រទេសបារាំងទៅកាន់ប្រទេសអង់គ្លេស តាមទូកដែលមានផ្ទុកមនុស្សលើសទម្ងន់ នៅថ្ងៃអង្គារ (២៣ មេសា) នេះ។

អាជ្ញាធរបាននិយាយថា ជនអន្តោប្រវេសន៍ប្រហែល ១១០នាក់ បានប្រជ្រៀតគ្នាយ៉ាងកកកុញនៅលើទូកតូចមួយ នៅពេលដែលការភ័យស្លន់ស្លោបានកើតមានឡើង។ ទាំងអាជ្ញាធរមូលដ្ឋាន និងឆ្មាំល្បាតសមុទ្រ មិនអាចនិយាយបានទេថា តើមានមនុស្សប៉ុន្មាននាក់ត្រូវបានជួយសង្គ្រោះ ឬអាចបាត់ខ្លួន។

អ្នកនាំពាក្យម្នាក់បាននិយាយថា ឆ្មាំល្បាតសមុទ្រ នៅតែបន្តប្រតិបត្តិការស្វែងរក និងជួយសង្គ្រោះ នៅសមុទ្រ បន្ទាប់ពីមាននូវអ្វីដែលមន្ត្រីបានហៅថា ជាព្រឹកដ៏មមាញឹក ដោយមានការប៉ុនប៉ងឆ្លងកាត់ជាច្រើន។

ការប៉ុនប៉ងឆ្លងកាត់នេះបានកើតមានឡើងបន្ទាប់ពីសភាជាន់ខ្ពស់របស់ចក្រភពអង់គ្លេស បានអនុម័តច្បាប់ កាលពីយប់ថ្ងៃចន្ទ (២២ មេសា) ដែលនឹងអនុញ្ញាតឲ្យរដ្ឋាភិបាលចក្រភពអង់គ្លេសបញ្ជូនអ្នកស្វែងរកសិទ្ធិជ្រកកោនទៅប្រទេសរ៉្វាន់ដាវិញ ជាជាងអនុញ្ញាតឲ្យស្នាក់នៅក្នុងប្រទេសអង់គ្លេស ដើម្បីដំណើរការនីតិវិធី។

គួរបញ្ជាក់ថា ផ្លូវទឹកនេះ គឺជាផ្លូវដឹកជញ្ជូនដ៏មមាញឹកបំផុតមួយរបស់ពិភពលោក ហើយចរន្តទឹកមានកម្លាំងខ្លាំង ដែលនាំឲ្យការធ្វើដំណើរឆ្លងកាត់តាមទូកតូចៗមានគ្រោះថ្នាក់៕