ប្រធានសិទ្ធិមនុស្សរបស់អង្គការសហប្រជាជាតិ (UN) លោក Volker Turk នៅថ្ងៃអង្គារ (ទី២៣ ខែមេសា) នេះ បាននិយាយថា លោក «ស្លុតចិត្តយ៉ាងខ្លាំង» នឹងការបំផ្លិចបំផ្លាញមន្ទីរពេទ្យ Nasser និង Al-Shifa នៅក្នុងតំបន់ហ្កាហ្សា និងរបាយការណ៍ពីផ្នូរដ៏ធំដែលមានសពរាប់រយនៅក្នុងនោះ។

អាជ្ញាធរប៉ាឡេស្ទីនបានរាយការណ៍ថា បានរកឃើញសពនៅក្នុងផ្នូរដ៏ធំមួយ នៅឯមន្ទីរពេទ្យក្នុងទីក្រុង Khan Younis នាសប្តាហ៍នេះ បន្ទាប់ពីទីកន្លែងនោះត្រូវបានបោះបង់ចោលដោយទាហានអ៊ីស្រាអែល។ ជាមួយគ្នានេះ សពក៏ត្រូវបានគេរាយការណ៍ផងដែរឃើញមាននៅទីតាំងនៃមន្ទីរពេទ្យ Al-Shifa បន្ទាប់ពីមានប្រតិបត្តិការកងកម្លាំងពិសេសរបស់អ៊ីស្រាអែល។

អ្នកនាំពាក្យរបស់ឧត្តមស្នងការ UN ទទួលបន្ទុកសិទ្ធិមនុស្ស គឺលោកស្រី Ravina Shamdasani បាននិយាយថា៖ «យើងមានអារម្មណ៍ថា ចាំបាច់ត្រូវផ្ដល់ការជូនដំណឹងនេះ ពីព្រោះច្បាស់ណាស់ មានការរកឃើញសពជាច្រើន។ សពមួយចំនួនត្រូវបានចងដៃជាប់ ដែលពិតណាស់បង្ហាញពីការរំលោភយ៉ាងធ្ងន់ធ្ងរលើច្បាប់សិទ្ធិមនុស្សអន្តរជាតិ និងច្បាប់មនុស្សធម៌អន្តរជាតិ ហើយទាំងនេះត្រូវតែមានការស៊ើបអង្កេតបន្ថែមទៀត»។

យោងតាមរបាយការណ៍ទាំងនោះ បានឲ្យដឹងថា សពត្រូវបានប្រទះឃើញកប់នៅក្រោមគំនរសំរាម ហើយមានស្ត្រី និងមនុស្សចាស់។

ដោយនិយាយតាមរយៈលោកស្រី Shamdasani នៅសន្និសីទសារព័ត៌មានរបស់ UN លោក Turk ក៏បានថ្កោលទោសការវាយប្រហាររបស់អ៊ីស្រាអែលលើតំបន់ហ្កាហ្សា ក្នុងរយៈពេលប៉ុន្មានថ្ងៃថ្មីៗនេះ ដែលលោកបាននិយាយថា បានសម្លាប់ស្ត្រី និងកុមារ ដោយភាគច្រើន។ លោកក៏បានព្រមានម្តងទៀតប្រឆាំងនឹងការវាយលុកទ្រង់ទ្រាយធំលើទីក្រុង Rafah ដោយនិយាយថា នេះអាចនាំឲ្យមាន «ឧក្រិដ្ឋកម្មដ៏ឃោរឃៅបន្ថែមទៀត»៕