សភាអ៊ឺរ៉ុប នៅថ្ងៃអង្គារ (ទី២៣ ខែមេសា) នេះ បានបោះឆ្នោតគាំទ្រដល់ការពន្យាររយៈពេល ១ឆ្នាំ ចំពោះការធ្វើពាណិជ្ជកម្មដោយមិនជាប់ពន្ធ សម្រាប់ផលិតផលកសិកម្មរបស់ប្រទេសអ៊ុយក្រែន ខណៈដែលក្នុងពេលជាមួយគ្នាដាក់ចេញនូវការទប់ស្កាត់ថ្មីលើកម្រិតនៃការនាំចូល ដើម្បីសម្រាលការតវ៉ាពីសំណាក់កសិកររបស់សហភាពអឺរ៉ុប (EU)។

ជាមួយនឹងសំឡេងអនុបវាទ ៤៤សំឡេង សភាបានបោះឆ្នោត ដោយមានសំឡេង ៤២៨ ទល់នឹង១៣១ គាំទ្រដល់ការបន្តពេលវេលានេះ ដែលឥឡូវនេះនឹងត្រូវអនុវត្តចាប់ពីថ្ងៃទី៦ ខែមិថុនា បន្ទាប់ពីធ្វើឲ្យជ្រះស្រឡះនូវឧបសគ្គនៃនីតិវិធីនានាចុងក្រោយ។

ការមិនយកពន្ធដែលមានតាំងពីខែមិថុនា ឆ្នាំ២០២២ នោះ ត្រូវបានរៀបចំឡើង ដើម្បីជួយរក្សាសេដ្ឋកិច្ចអ៊ុយក្រែនឲ្យដំណើរការទៅមុខ នៅពេលដែលប្រទេសនេះជាប់ទប់ទល់នឹងការលុកលុយរបស់រុស្ស៊ី។

បើយោងតាមអ្នកការទូតសហភាពអឺរ៉ុប បានឲ្យដឹងថា ការរឹត្បិតនេះមានន័យថា អ៊ុយក្រែននឹងរកបានចំណូល ៣៣១លានអឺរ៉ូ (៣៥៣,២លានដុល្លារ) ដែលតិចជាងការនាំចេញទៅ EU ក្នុងឆ្នាំ២០២៣។

នេះនឹងជាការពន្យារពេលលើកចុងក្រោយ។ សហភាពអឺរ៉ុប និងអ៊ុយក្រែន មានគោលបំណងរៀបចំរយៈពេលវែងជាងនេះ ចាប់ពីខែមិថុនា ឆ្នាំ២០២៥៕