កាលពីថ្ងៃទី២២ ខែមេសា ឆ្នាំ២០២៤ ឯកឧត្តម សេង ទៀង នាយករងខុទ្ធកាល័យ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុន សែន រួមនឹងក្រុមការងារ បានចុះពិនិត្យមើលទីតាំងសាលាបឋមសិក្សាអន្លង់អក ដើម្បីសាងសង់អគារសិក្សា ១ខ្នង មាន៦បន្ទប់ ទីចាត់ការ ១ខ្នង មាន ៣បន្ទប់ (សង់ផុតដី ៣.៦ ម៉ែត្រ) និងហេដ្ឋារចនាសម្ព័ន្ធរួមមានឧបករណ៍ទឹក ១ឈុត ក្លោងទ្វារតូច១ របងជុំវិញសាលារៀនប្រវែង១៦៣.៨ ម៉ែត្រ ដងទង់ជាតិ១ និងផ្លូវបេតុង២០៤ ម៉ែត្រការ៉េ ដែលជាអំណោយដ៏ថ្លៃថ្លារបស់សម្តេចទាំងទ្វេ បន្ទាប់ពីសម្តេចតេជោ បានឃើញវីដេអូតាមបណ្តាញសង្គមហ្វេសប៊ុករបស់ក្រុមការងារខ្មៅដៃសប្បុរសធម៌ កាលពីថ្ងៃទី២១ ខែមេសា ឆ្នាំ២០២៤។
សូមជម្រាបថា សាលាបឋមសិក្សាអន្លង់អក ស្ថិតនៅភូមិថ្មី ឃុំកំពង់អុស ស្រុកជល់គិរី ខេត្តកំពង់ឆ្នាំង បច្ចុប្បន្នមានលោកគ្រូអ្នកគ្រូចំនួន ៣រូប សិស្សានុសិស្សចំនួន ៥៣នាក់ និងសិស្សផ្ញើមួយចំនួនទៀត៕