រដ្ឋមន្ត្រីការពារជាតិរុស្ស៊ី លោក សើហ្កេ សយហ្គូ (Sergei Shoigu) បាននិយាយកាលពីថ្ងៃអង្គារ (២៣ មេសា) ថាប្រទេសរុស្ស៊ី នឹងបង្កើនការវាយប្រហារលើមជ្ឈមណ្ឌលដឹកជញ្ជូន និងឃ្លាំងផ្ទុកអាវុធលោកខាងលិចក្នុងប្រទេសអ៊ុយក្រែន នៅក្នុងការឆ្លើយតបដោយផ្ទាល់ជាលើកដំបូងរបស់ទីក្រុងមូស្គូ ចំពោះការអនុម័តជំនួយយោធារបស់សហរដ្ឋអាមេរិក សម្រាប់ទីក្រុងគីវ។

រដ្ឋមន្ត្រីការពារជាតិរូបនោះបន្ថែមថា រុស្ស៊ី បាន «លុបបំបាត់ទេវកថានៃឧត្តមភាពសព្វាវុធរបស់លោកខាងលិច» ខណៈដែលកងកម្លាំងរបស់ខ្លួនមានប្រៀបនៅតាមបណ្តោយសមរភូមិជួរមុខ ហើយកំពុងឆ្ពោះទៅមុខប្រឆាំងនឹងកងកម្លាំងដ៏ទន់ខ្សោយអ៊ុយក្រែន។

លោក សយហ្គូ បាននិយាយក្នុងអំឡុងពេលកិច្ចប្រជុំក្រុមប្រឹក្សារបស់ក្រសួងការពារជាតិថា ចាការសមាមាត្រទៅនឹងការគំរាមកំហែងដែលបង្កឡើងដោយសហរដ្ឋអាមេរិក និងសម្ព័ន្ធមិត្ត រុស្ស៊ីនឹងបន្តធ្វើឱ្យប្រសើរឡើងនូវសមាសភាពយោធារបស់ខ្លួន និងផលិតអាវុធ ព្រមទាំងគ្រឿងយុទ្ធោបករណ៍ឱ្យកាន់តែច្រើន។

ខណៈពេលដែលព្រឹទ្ធសភាសហរដ្ឋអាមេរិក កាលពីថ្ងៃអង្គារបានអនុម័តកញ្ចប់ថវិកាចំនួន ៩៥ ពាន់លានដុល្លារ ដែលបានពន្យារពេលជាយូរមកហើយ ក្នុងការបញ្ជូនជំនួយទៅអ៊ុយក្រែន អ៊ីស្រាអែល និងកោះតៃវ៉ាន់ កងកម្លាំងរុស្ស៊ី បានបន្តវាយលុកអ៊ុយក្រែន ដោយមីស៊ីល យានដ្រូន និងកាំភ្លើងធំ ហើយដណ្ដើមទឹកដីមួយចំនួន និងបំផ្លាញគ្រឿងយុទ្ធោបករណ៍អ៊ុយក្រែន អស់ជាច្រើន៕