ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញប្រារព្ធទិវាជាតិប្រយុទ្ធ នឹងជំងឺគ្រុនចាញ់ ក្រោមប្រធានបទ"លើកកម្ពស់សមធម៌សុខភាព សមភាពយេនឌ័រ និងសិទ្ធិមនុស្ស ដើម្បីប្រយុទ្ធនឹងជំងឺគ្រុនចាញ់"នៅព្រឹកថ្ងៃទី២៤ ខែមេសា ឆ្នាំ២០២៤នេះ នៅបរិវេណកីឡដ្ឋាន ស្ថិតក្នុងភូមិបោះពួយ ឃុំលាច ស្រុកភ្នំក្រវាញ ខេត្តពោធិ៍សាត់។
ទិវាជាតិប្រយុទ្ធនឹងជំងឺគ្រុនចាញ់ឆ្នាំនេះ ប្រារព្ធឡើងក្នុងគោលបំណងបន្តជំរុញ និងយកចិត្តទុកដាក់ចូលរួមបន្ថែមទៀត ក្នុងការលើកកម្ពស់សុខភាពរបស់ប្រជាជនឱ្យបានកាន់តែទូលំទូលាយ និងបំផុសការយល់ដឹង ការចូលរួមអនុវត្តវិធានការបង្ការនានា ដើម្បីឈានទៅលុបបំបាត់នឹងជំងឺគ្រុនចាញ់ តាមរយៈសកម្មភាពផ្តល់សេវាជំងឺគ្រុនចាញ់ប្រកបដោយគុណភាព ប្រសិទ្ធភាពសាកសិទ្ធភាព និងមានសារៈសំខាន់សម្រាប់មនុស្សគ្រប់រូបដោយមិនគិតពីពណ៌សម្បុរ ភេទ ពូជសាសន៍ ជាតិសាសន៍ ស្ថានភាពសេដ្ឋកិច្ច ឬសង្គម ឬស្ថានភាពផ្សេងទៀត ជាពិសេសសម្រាប់អ្នកដែលមានហានិភ័យខ្ពស់ និងមិនទាន់ទទួលបានសេវា រហូតឈានសម្រេចបាននូវគោលដៅគ្មានជំងឺគ្រុនចាញ់ ក្នុងព្រះរាជជាណាចក្រកម្ពុជា ចាប់ពីឆ្នាំ២០២៥តទៅ។
ឯកឧត្តម ខូយ រីដា អភិបាលខេត្តពោធិ៍សាត់បានលើកឡើងថា ស្ថានភាពជំងឺគ្រុនចាញ់នៅក្នុងខេត្តពោធិ៍សាត់ មានការវិវត្ត ជាវិជ្ជមាន គួរឱ្យកត់សម្គាល់ ដូចខាងក្រោមនេះ ៖ គ្មានករណីស្លាប់ដោយជំងឺគ្រុនចាញ់ តាំងពី ឆ្នាំ២០១៤ រហូតមកដល់បច្ចុប្បន្ននេះ ករណីជំងឺគ្រុនចាញ់បានថយចុះ ពីចំនួន ១៣៩២១ករណី នៅឆ្នាំ២០១៨ មកនៅត្រឹមចំនួនតែ៩៥ករណីប៉ុណ្ណោះ នៅឆ្នាំ២០២៣ ករណីគ្រុនចាញ់ ប្រភេទមេរោគ ផ្លាស្ម៉ូឌីយ៉ូមហ្វាល់ស៊ីប៉ារ៉ូម និងចំរុះ បានថយចុះ ពីចំនួន៣៦៧១ករណី នៅឆ្នាំ ២០១៨ មកនៅត្រឹមតែចំនួន០៦ករណី ប៉ុណ្ណោះ នៅឆ្នាំ២០២៣អាំងស៊ីដង់ជំងឺគ្រុនចាញ់ បានថយចុះពីចំនួន២៨ក្នុងចំណោមប្រជាជន ១០០០នាក់ នៅ ឆ្នាំ២០១៨ មកត្រឹម ចំនួន ០.១៨ ក្នុងចំណោមប្រជាជន១០០០នាក់នៅឆ្នាំ២០២៣ ។
លោកស្រី Kerry Pelzman នាយិកាបេសកកម្ម USAID និងលោកស្រីវេជ្ជបណ្ឌិត Marianna Trias តំណាង WHO ប្រចាំកម្ពុជា បានប្តេជ្ញាចិត្តរួមគ្នាគាំទ្រដល់រាជរដ្ឋាភិបាលកម្ពុជា នឹងបន្តធ្វើការយ៉ាងជិតស្និទ្ធជាមួយរាជរដ្ឋាភិបាល ដើម្បីពង្រីកការឃ្លាំមើលប្រសិទ្ធភាពឱសថរួមបញ្ចូលគ្នា ដើម្បីកុំឱ្យនរណាម្នាក់នៅសេសសល់ក្នុងការស្វែងរក និងគ្មានករណីជំងឺគ្រុនចាញ់ និងលើសពីនេះទៀតរួមគ្នាដែលអាចកសាងអនាគតមួយ ដែលបុគ្គលគ្រប់រូបទទួលបានសិទ្ធិស្មើគ្នាចំពោះសុខភាព និងសុខុមាលភាពរបស់មនុស្ស ដោយមិនមានការគំរាមកំហែងពីជំងឺដែលអាចកើតមានបាន។
ក្នុងឱកាសដ៏ឧត្តុង្គឧត្តមនេះ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអានសារលិខិតសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងឱកាសទិវាជាតិប្រយុទ្ធនឹងជំងឺគ្រុនចាញ់ និងគោរពថ្លែងអំណរគុណដោយស្មោះអស់ពីចិត្តជូនចំពោះសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ប្រធានក្រុមឧត្តមទីប្រឹក្សាផ្ទាល់ព្រះមហាក្សត្រ និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលជានិច្ចកាលសម្តេចទាំងទ្វេរតែងតែយកចិត្តទុដាក់ជួយឧបត្ថម្ភគាំទ្រដល់វិស័យសុខាភិបាល។
ឯកឧត្តមសាស្ត្រាចារ្យក៍បានថ្លែងអំណរគុណចំពោះការខិតខំប្រឹងប្រែង អស់ពីកម្លាំងកាយចិត្តរបស់ ឯកឧត្តមលោកជំទាវ ជាថ្នាក់ដឹកនាំក្រសួង ស្ថាប័ន រាជធានី-ខេត្ត មន្ត្រីរាជការសុខាភិបាលគ្រប់លំដាប់ថ្នាក់ ក្រុមការងារពិសេសលុបបំបាត់ជំងឺគ្រុនចាញ់ខេត្ត/ស្រុក ដែលបានប្រកាន់ជំហររឹងមាំក្នុងការទទួលខុសត្រូវលើការងារលុបបំបាត់ជំងឺគ្រុនចាញ់ទទួលបានសមិទ្ធផលជាទីមោទនៈ ជាបន្តបន្ទាប់ និងបានអំណរគុណដល់ម្ចាស់ជំនួយ ដៃគូអង្គការជាតិ-អន្តរជាតិ ដែលបាននិងកំពុងសហការជួយឧបត្ថម្ភគាំទ្រដល់ការងារប្រយុទ្ធ និងលុបបំបាត់ជំងឺគ្រុនចាញ់នៅកម្ពុជា។
សូមបញ្ជាក់ផងដែរ ទិវាជាតិប្រយុទ្ធនឹងជំងឺគ្រុនចាញ់ មានវត្តមានអញ្ជើញចូលរួមពីសមាជិក សមាជិកា និងភ្ញៀវកិត្តិយស អញ្ជើញចូលរួមយ៉ាងច្រើនកុះករមកពីក្រសួងសុខាភិបាល, ក្រសួងមហាផ្ទៃ, ក្រសួងការពារជាតិ, ក្រសួងបរិស្ថាន, ក្រសួងទេសចរ, ក្រសួងកិច្ចការនារី, មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ជាពិសេសមានការចូលរួមពីសំណាក់ កងកំលាំងប្រដាប់អាវុធ ថ្នាក់ដឹកនាំ មន្រ្តីនៃមន្ទីរសុខាភិបាល ការិយាល័យស្រុកប្រតិបត្តិ មណ្ឌលសុខភាព ថ្នាក់ដឹកនាំមន្រ្តីរាជការនៃមន្ទីរអង្គភាពជុំវិញសាលាខេត្ត មន្រ្តីឧទ្យានុរក្ស អាជ្ញាធរមូលដ្ឋាន លោកគ្រូ អ្នកគ្រូ សិស្សានុសិស្ស និងប្រជាជន អ្នកស្ម័គ្រចិត្តភូមិព្យាបាលជំងឺគ្រុនចាញ់ ព្រមទាំងអង្គការដៃគូរអភិវឌ្ឍន៍ និងអនុវត្តនានាមានដូចជា៖អង្គការសុខភាពពិភពលោក WHO, UNOPS, USAID/PMI, PSM/USAID, CMEP-URC, PHB/PSI, HSD, CRS, MC, CHAI, DKSH សរុបប្រមាណ ១២០០នាក់៕ អត្ថបទ រដ្ឋា