បណ្តុំអង្គការសង្គមស៊ីវិល និងសមាគមនានានៅកម្ពុជា នៅថ្ងៃទី២៣-២៤ ខែមេសា ឆ្នាំ ២០២៤នេះ បានចេញសេចក្ដីថ្លែងការណ៍ ប្រកាសថ្កោលទោស ចំពោះសកម្មភាពរបស់ គណបក្សកម្លាំងជាតិ ដែលបង្កភាពវឹកវរដោយចេតនាចំពោះជាតិ តាមរយៈការប្រមូលផ្ដុំសកម្មជនរបស់ខ្លួនធ្វើបាតុកម្មពាក់ព័ន្ធនឹងចំណាត់ការរបស់តុលាការ។
បណ្តុំអង្គការសង្គមស៊ីវិល និងសមាគមនានាបានលើកឡើងថា ពួកគេធ្លាប់ឃើញសកម្មភាព និងមានបទពិសោធន៍នៃការបង្កភាពវឹកវរដល់សង្គមជាតិរបស់ក្រុមជ្រុលនិយមនាពេលកន្លងមក។ ក្រុមប្រឆាំងជ្រុលនិយមបានរៀបចំយុទ្ធសាស្រ្តបំបែកកបំបាក់កម្លាំងសាមគ្គីភាព ស្របពេលដែលប្រទេសកម្ពុជាកំពុងតែមានសេចក្តីសុខក្សេមក្សាន្ត និងការអភិវឌ្ឍន៍យ៉ាងឆាប់រហ័ស។
លោក ហេង សំណាង ប្រធានបណ្តុំអង្គការសង្គមស៊ីវិល លើកឡើងថា ប្រទេសកម្ពុជាធ្លាប់ឆ្លងកាត់ការឈ្លានពានពីបរទេសដោយការសាបព្រោះមនោគមវិជ្ជានយោបាយខ្មៅកខ្វក់ លាបពណ៌ ញុះញង់ បំបែកបំបាក់ រហូតដល់កម្ពុជាសឹងបាត់បង់ប្រទេសទាំងមូល។ តើប្រជាពលរដ្ឋខ្មែរគ្រប់រូបនៅចាំបានទេ? លោករម្លឹកឡើងថា កម្ពុជាត្រូវបានចាប់ផ្តើមកសាងឡើងវិញចាប់ពីបាតដៃទទេ រហូតមានការរីកចម្រើនលើគ្រប់វិស័យ ការបូជាសាច់ស្រស់ឈាមស្រស់របស់ប្រមុខថា្នក់ដឹកនាំ ដើម្បីតែបុព្វហេតុជាតិ និងបូរណភាពទឹកដី និងអធិបតេយ្យភាពពេញលេញ។ បច្ចុប្បន្នកម្ពុជាក្លាយជាប្រទេសស្មើមុខស្មើមាត់នៅលើសាកលលោក និងមានការអភិវឌ្ឍជឿនលឿនឆាប់រហ័សជាងគេបំផុតនៅក្នុងតំបន់។
លោកបញ្ជាក់ថា ការសម្ដែងការមិនពេញចិត្តជាមួយនឹងភាពរីកចម្រើនរបស់ប្រទេសជាតិខ្លួន និងការប្រឆាំងទៅលើចំណាត់ការរបស់តុលាការ គឺជាទង្វើក្បត់ជាតិកំណើតខ្លួន។ ដូច្នេះបណ្តុំអង្គការសង្គមស៊ីវិល ប្រកាសថ្កោលទោស និងប្រឆាំងយ៉ាងដាច់អហង្ការ ចំពោះទង្វើលដ៏គឃ្លើញរបស់គណបក្សនយោបាយដែលមានឈាមជាខ្មែរតែទទួលមនោគមពីក្រៅប្រទេស ចង់បំផ្លាញសុខសន្តិភាព និងការអភិឌ្ឍរបស់សង្គមជាតិខ្មែរបច្ចុប្បន្ន។
សូមជម្រាបថាតាមរយៈសេចក្ដីថ្លែងការណ៍របស់ បណ្តុំអង្គការសង្គមស៊ីវិល និងសមាគមនានា បានអំពាវនាវដល់ប្រជាជនខ្មែរគ្រប់រូប គួរគិតគូរពីមនសិកាជាតិនិយម ឈប់ចាញ់កលមនោគមវិជ្ជាខ្មៅកខ្វក់ របស់ក្រុមនយោបាយក្រុមជ្រុលនិយមក្រៅប្រទេស។ កុំចូលរួមជាមួយសកម្មភាពដែលបង្ហាញពីភាពបែកបាក់សាមគ្គី តាមការញុះញង់របស់ក្រុមនយោបាយជ្រុលនិយមមួយចំនួនតូចដែលមានចេតនាចង់បង្កភាពវឹកវរដល់សង្គមជាតិខ្លួនឱ្យសោះ៕ អត្ថបទ៖ វ៉ន ដារ៉ា