តំបន់ ប៊ែលហ្គោរ៉ូដ (Belgorod) របស់រុស្ស៊ី ដែលមានព្រំប្រទល់ជាប់នឹងប្រទេសអ៊ុយក្រែន បាននិយាយថា ជនស៊ីវិល ១២០ នាក់ត្រូវបានសម្លាប់នៅទីនោះ នៅក្នុងការវាយប្រហាររបស់អ៊ុយក្រែន និងមនុស្ស ៦៥១ នាក់បានរងរបួស ចាប់តាំងពីសង្គ្រាមបានចាប់ផ្តើមជាងពីរឆ្នាំមុនមក។
តំបន់ ប៊ែលហ្គោរ៉ូដ ត្រូវបានវាយប្រហារម្ដងហើយម្ដងទៀតដោយកាំភ្លើងធំ យានដ្រូន និងក្រុមប្រយុទ្ធតំណាង (ប្រូកស៊ី) របស់អ៊ុយក្រែន កាលពីឆ្នាំមុន បន្ទាប់ពីរុស្ស៊ី បានឈ្លានពានអ៊ុយក្រែន ក្នុងខែកុម្ភៈ ឆ្នាំ២០២២។
អភិបាលតំបន់ លោក វ្យ៉ាឆេស្លាវ ហ្ក្លាដខូវ (Vyacheslav Gladkov) បាននិយាយថា កុមារ ១១ នាក់ស្ថិតក្នុងចំណោមអ្នកស្លាប់នោះ និងកុមារ ៥១ នាក់បានរងរបួស ហើយអ្នកខ្លះត្រូវបាត់បង់អវៈយវៈ។
ទីក្រុងគីវ បដិសេធថាមិនបានធ្វើការវាយប្រហារលើជនស៊ីវិលទេ ហើយនិយាយថាខ្លួនមានសិទ្ធិវាយប្រហាររុស្ស៊ី ខណៈក្រុមមន្ត្រីអាមេរិក មានការព្រួយបារម្ភថាការវាយប្រហារលើទឹកដីរុស្ស៊ី អាចបង្កឱ្យមានសង្គ្រាមកាន់តែខ្លាំងឡើង ជាមួយនឹងក្រុមប្រូកស៊ីអ៊ុយក្រែន បានព្យាយាមម្តងហើយម្តងទៀតដើម្បីទម្លុះព្រំដែនហើយវាយរុញចូលទៅក្នុងតំបន់ ប៊ែលហ្គោរ៉ូដ។
រុស្ស៊ីនិយាយថា ការប្រើប្រាស់អាវុធរបស់លោកខាងលិចដើម្បីវាយប្រហារ ប៊ែលហ្គោរ៉ូដ បង្ហាញថាលោកខាងលិចគឺជាភាគីនៃសង្គ្រាមដ៏សំខាន់រួចទៅហើយ ដែលបានសម្លាប់ និងធ្វើឱ្យទាហានជាច្រើនពាន់នាក់រងរបួស ប៉ុន្តែទាំងរុស្ស៊ី និងអ៊ុយក្រែន មិនផ្តល់តួលេខទាហានរងគ្រោះរបស់ពួកគេទេ៕