ក្រុមនិស្សិតដែលសិក្សាលើមុខជំនាញផ្សេងៗគ្នានៅរាជធានីភ្នំពេញ បានប្រាប់ឲ្យដឹងថា បច្ចុប្បន្ននេះពួកគេលែងមានការព្រួយបារម្ភថាខ្វះការងារ ឬខុសជំនាញ នៅពេលបញ្ចប់ថ្នាក់សិក្សានោះទេ ដោយសារតម្រូវការទីផ្សារការងារមានកាន់តែច្រើន ដែលកំពុងត្រូវការធនធានមនុស្សជាចាំបាច់។
យុវជន នី ប្រាហ៊ីម មកពីខេត្តកំពង់ចាម និស្សិតឆ្នាំទី២ ជំនាញផ្នែកអក្សរសាស្រ្តខ្មែរ នៅសាកលវិទ្យាល័យភូមិន្ទភ្នំពេញ ក្នុងកិច្ចសម្ភាសន៍ជាមួយព័ត៌មាន ប៊ីធីវី នៅព្រឹកថ្ងៃទី២៤ ខែមេសានេះ បានលើកឡើងថា ជាការមើលឃើញជាក់ស្តែងសព្វថ្ងៃនេះ ដោយសារការទាក់ទាញវិនិយោគកាន់តែច្រើនឡើងនៅក្នុងប្រទេស ធ្វើឲ្យតម្រូវការការងារក៏មានកាន់តែខ្ពស់និងគ្រប់វិស័យ ដែលទាមទារឲ្យយុវជនក្នុងស្រុក បង្កើនចំណេះដឹង និងជំនាញ ដើម្បីឆ្លើយតបតម្រូវការទីផ្សារការងារទាំងពេលបច្ចុប្បន្ន និងអនាគត។
ស្រដៀងគ្នានេះ កញ្ញា សាន ស្រីណប់ មកពីខេត្តកំពង់ឆ្នាំង បច្ចុប្បន្នជានិស្សិតឆ្នាំទី២ រៀនជំនាញផ្នែកអក្សរសាស្រ្តខ្មែរដូចគ្នា បាននិយាយថា អត្រាការងារបច្ចុប្បន្ន គឺមានច្រើនណាស់ និងមិនមែនតែមួយផ្នែកផងដែរ។ អ្វីដែលសំខាន់ចំពោះមុខ គឺការត្រៀមខ្លួនដើម្បីឆ្លើយតបទីផ្សារការងារដែលកំពុងមានតម្រូវការ ហើយប្រសិនជាអាច យុវជនគួរសាកល្បងធ្វើការងារសមស្របណាមួយ ដើម្បីទទួលបានបទពិសោធន៍ពីការងារ។
យុវជនទាំង២រូបនេះ បានទទួលស្គាល់ទៀតថា ការផ្សព្វផ្សាយអំពីព័ត៌មានទីផ្សារការងារសព្វថ្ងៃនេះ ពិតជាមានភាពទូលំទូលាយជាងមុន ថែមទាំងផ្តល់ឱកាសកាន់តែជាច្រើន ក្នុងការស្វែងយល់ពីតម្រូវការការងារក្នុងពេលបច្ចុប្បន្ន និងអនាគត។
សូមបញ្ជាក់ថា ក្នុងគោលបំណងឆ្លើយតបតម្រូវការការងារ ក៏ដូចជាផ្តល់នូវដំណោះស្រាយបញ្ហាទីផ្សារការងារ រាជរដ្ឋាភិបាលកម្ពុជា បានបង្កើតទីភ្នាក់ងារជាតិមុខរបរនិងការងារ(NEA) ដើម្បីផ្តល់សេវាការងារ និងព័ត៌មានទីផ្សារការងារជាសាធារណៈនៅមួយកន្លែង និងងាយស្រួលតាមរយៈប្រព័ន្ធផ្សព្វផ្សាយនានា ដូចជា តាមរយៈគេហទំព័រ www.nea.gov.kh, ហ្វេសប៊ុក , តេឡេក្រាម និងនៅតាមមជ្ឈមណ្ឌលការងារនៅរាជធានី-ខេត្ត និងរថយន្តចល័ត។
បន្ថែមពីនេះទៀត គិតចាប់ពីថ្ងៃទី២២ ដល់៣០ ខែមេសា ឆ្នាំ២០២៤ មជ្ឈមណ្ឌលការងារចល័តរបស់ទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ បានបង្កើនការចុះផ្សព្វផ្សាយឱកាសការងារនៅតាមសាកលវិទ្យាល័យ និងគ្រឹះស្ថានសិក្សានានា នៅរាជធានីភ្នំពេញ ដើម្បីផ្តល់ព័ត៌មានអំពីទីផ្សារការងារ ក៏ដូចជាការនាំយកឱកាសការងារឲ្យកាន់តែខិតជិតដល់យុវជន និងអ្នកស្វែងរកការងារ ដើម្បីបង្កើនលទ្ធភាពនៃការទទួលបានការងារកាន់តែឆាប់រហ័ស៕អត្ថបទ ឈិត បូរ៉ាវី