រយៈពេល៣ថ្ងៃមកហើយដែលក្រសួងមុខងារសាធារណៈ ប្រកាសទទួលពាក្យតាមប្រព័ន្ធអនឡាញ លើការចូលរួមប្រឡងជ្រើសរើសគ្រូបង្រៀនសម្រាប់កម្រិត បឋមសិក្សា ក្របខណ្ឌក្រសួងអប់រំយុវជន និងកីឡាចំនួន ១៣៤៧នាក់។ នាអំឡុងពេលនេះយុវជនជាច្រើនបានរៀបចំដាក់ពាក្យប្រឡងនៅតាមបណ្តាមន្ទីរមុខងារសាធារណៈរាជធានី-ខេត្ត។
លោក លាង ច័ន្ទរង្ស៊ី ប្រធានមន្ទីរមុខងារសាធារណៈខេត្តកណ្តាល បានថ្លែងប្រាប់ BTV នៅថ្ងៃទី២៤ ខែមេសានេះថា ក្រោយពីក្រសួងមុខងារសាធារណៈប្រកាសសេចក្តីជូនដំណឹង ដល់សិស្ស-និស្សិត និងសាធារណជន ស្តីពីការប្រឡងជ្រើសរើសគ្រូបង្រៀន សម្រាប់បង្រៀននៅបឋមសិក្សា ក្នុងក្របខ័ណ្ឌក្រសួងអប់រំយុវជន និងកីឡាប្រមាណ ១៣៤៧នាក់ មានសិស្ស និស្សិត ជាហូរហែរ បានមកសាកសួរព័ត៌មានបន្ថែមអំពីរបៀបការចុះឈ្មោះប្រព័ន្ធអនឡាញ នៅមន្ទីរមុខងារសាធារណៈខេត្ត ខណៈនៅខេត្តកណ្តាល ក៏មានការប្រឡងជ្រើសរើសគ្រូបង្រៀនបឋមសិក្សា ១២ +២ ចំនួន៣៧រូប និងគ្រូ ១២+៤ ចំនួន១៤រូបផងដែរ។
បណ្តាសិស្សនិស្សិត ថ្លែងថា ការដាក់ពាក្យសុំប្រឡងជ្រើសរើសគ្រូបង្រៀនបឋមសិក្សានេះ ពួកគេបានបំពេញពាក្យសុំនៅតាមតំណរភ្ជាប់ ប្រព័ន្ធអនឡាញទាំងអស់គ្នា ដែលមានភ្ជាប់ជូននៅក្នុងសេចក្តីជូនដំណឹងរបស់ក្រសួងមុខាងសាធារណៈ ក្រៅពីនេះពួកគេបានមកសាកសួរព័ត៌មានបន្ថែមនៅមន្ទីរមុខងារសាធារណៈខេត្តកណ្តាល ដើម្បីបញ្ជាក់ពី ភាពច្បាស់លាស់ នៅក្នុងសេចក្តីជូនដំណឹងរបស់ក្រសួងផងដែរ។
សូមបញ្ជាក់ថា អនុវត្តផែនការក្របខណ្ឌឆ្នាំ២០២៣ នៅក្នុងឆ្នាំ២០២៤នេះ គណៈកម្មការរៀបចំការប្រឡងប្រជែង របស់ក្រសួងមុខងារសាធារណៈ បានជូនដំណឹងដល់សិស្ស និស្សិត និងសាធារណជន ស្តីពីការប្រឡងប្រជែងជ្រើសរើសគ្រូបង្រៀនសម្រាប់បង្រៀននៅបឋមសិក្សា ក្នុងក្របខណ្ឌក្រសួងអប់រំ យុវជន និងកីឡា ចំនួន ១៣៤៧នាក់ ក្នុងនោះ គ្រូបង្រៀនបឋមសិក្សាតាមប្រព័ន្ធបណ្តុះបណ្តាល ១២+៤ ជំនាន់ទី៤ ចំនួន ៣០០នាក់ និងគ្រូបង្រៀនបឋមសិក្សាតាមប្រព័ន្ធបណ្តុះបណ្តាល ១២+២ ជំនាន់ទី៤០ ចំនួន ១,០៤៧នាក់ ដែលការទទួលពាក្យសុំសិទ្ធប្រឡងគឺធ្វើឡើងប្រព័ន្ធអនឡាញចាប់ពីថ្ងៃទី២២ ខែមេសា ដល់ថ្ងៃទី២២ ខែឧសភាឆ្នាំ២០២៤ ហើយសិស្សប្រឡងបាក់ឌុបជាប់និទ្ទេស A និងB គឺត្រូវបានផ្តល់អាទិភាព នៅក្នុងដំណើរការប្រឡង៕ អត្ថបទ ស៊ុម សុខជា