អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា គណៈកម្មការខេត្តរៀបចំការបោះឆ្នោតមួយចំនួនបានទទួលបណ្តឹងចំនួន៧ ដែលបានប្តឹងជំទាស់ទៅលើការបិទផ្សាយបញ្ជីបោះឆ្នោតដំបូង នៃការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ អាណត្តិទី៤។
ឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានប្រាប់ BTV នៅថ្ងៃទី២៤ ខែមេសា ឆ្នាំ២០២៤ថា ស្របពេលដំណើរការឆ្ពោះទៅរកការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ អាណត្តិទី៤ សល់តែជិត១ខែទៀតប៉ុណ្ណោះ។ គណៈកម្មការខេត្តរៀបចំការបោះឆ្នោតបានចាប់ផ្តើមការទទួលពាក្យបណ្តឹងតវ៉ា និងបណ្តឹងជំទាស់ទៅលើការបិទផ្សាយបញ្ជីបោះឆ្នោតដំបូងជាបន្តបន្ទាប់។
អ្នកនាំពាក្យ គ.ជ.ប បញ្ជាក់ថា មកដល់ពេលនេះ មានគណៈកម្មការខេត្តរៀបចំការបោះឆ្នោតចំនួន៤ រួមមាន ខេត្តកំពត ស្វាយរៀង តាកែវ និងពោធិ៍សាត់ ដែលទទួលបានបណ្តឹងចំនួន៧ និងបានប្តឹងជំទាស់ទៅលើការស្នើសុំលុបឈ្មោះអ្នកទទួលមរណភាព និងការស្នើសុំលាលែងពីសាម៉ីខ្លួនជាសមាជិកក្រុមប្រឹក្សាឃុំ។
អ្នកនាំពាក្យរូបនេះ អះអាងថា ទោះបីមានពាក្យបណ្តឹងតវ៉ា ឬបណ្តឹងជំទាស់ក្តី ក៏មិនអាចប៉ះពាល់ដល់ការប្រកាសបញ្ជីបោះឆ្នោតផ្លូវការនោះទេ ដោយសារ គ.ជ.ប នឹងអនុវត្តឱ្យបានត្រឹមត្រូវទៅតាមនីតិវិធី និងការកំណត់ដោយច្បាប់ សម្រាប់យកទៅប្រើប្រាស់ក្នុងបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌនាពេលខាងមុខ។
អ្នកនាំពាក្យរូបនេះ បន្តថា ការបិទផ្សាយបញ្ជីបោះឆ្នោតដំបូង អង្គបោះឆ្នោតមានសិទ្ធិប្តឹងតវ៉ា ឬជំទាស់ ក្នុងរយះពេល៨ថ្ងៃ ចាប់ពីថ្ងៃបិទផ្សាយបញ្ជីបោះឆ្នោតដំបូង គឺចាប់ពីថ្ងៃទី២០ ដល់ថ្ងៃទី២៨ ខែមេសា ឆ្នាំ២០២៤។ ក្នុងករណីការប្តឹងតវ៉ា ឬជំទាស់មិនអាចទទួលយកបាន អង្គបោះឆ្នោតមានសិទ្ធិប្តឹងបន្តមកកាន់គណៈកម្មាធិការជាតិរៀបចំការបោះឆ្នោត។
សូមជម្រាបថា គ.ជ.ប បានប្រកាសទទួលស្គាល់ជាផ្លូវការចំពោះគណបក្សនយោបាយចំនួន៥ ឱ្យចូលរួមការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ អាណត្តិទី៤ ឆ្នាំ២០២៤ ក្នុងនោះ រួមមាន៖ គណបក្សប្រជាជនកម្ពុជា, គណបក្សឆន្ទៈខ្មែរ, គណបក្សកម្លាំងជាតិ, គណបក្សហ្វ៊ុនស៊ីនប៉ិច និងគណបក្សខ្មែររួបរួមជាតិ ដោយការបោះឆ្នោតនេះនឹងប្រព្រឹត្តទៅនាថ្ងៃទី២៦ ខែឧសភា ឆ្នាំ២០២៤៕ អត្ថបទ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
