ភ្នំពេញ៖ ប្រជាពលរដ្ឋក្នុងមូលដ្ឋានខណ្ឌឫស្សីកែវ ត្រូវបានទទួលវិញ្ញាបនបត្រស​ម្គាល់ម្ចាស់​អចលន​វត្ថុ ក្រោយអាជ្ញាធរខណ្ឌឬស្សីកែវ មន្ទីររៀបចំដែនដីនគរូបនីយកម្មសំណង់ និង​សុរិយោដី​រាជ​ធានី​ភ្នំពេញរៀបចំរួចរាល់។

ជាក់ស្ដែងនៅព្រឹកថ្ងៃពុធ ទី២៤ ខែមេសាឆ្នាំ២០២៤នេះ នៅក្នុងបរិវេណ​វិហារ​ម៉ាស្ចិត​នូរុ​នណាអ៊ីម គីឡូម៉ែត្រលេខ៨ បានប្រារព្ធពិធីចែកវិញ្ញាបនបត្រសម្គាល់ម្ចាស់អចលនវត្ថុ ស្ថិត​នៅ​ក្នុង​ភូមិក ភូមិឃ និងភូមិខ២ សង្កាត់ច្រាំងចំរេះទី២ ក្រោមអធិបតីភាព លោក ជិន ប៊ុនធឿន អភិបាល​ខណ្ឌឫស្សីកែវ តំណាង ឯកឧត្តម ឃួង ស្រេង អភិបាលនៃ​គណៈ​អភិបាល​រាជ​ធានី​ភ្នំពេញ និងលោក ពឹង រតនៈ អនុប្រធានមន្ទីររៀបចំដែនដីនគរូបនីយកម្មសំណង់ និង​សុរិយោដី​រាជ​ធានី​ភ្នំពេញ ។

នាឱកាសនោះ លោក ជិន ប៊ុនធឿន អភិបាលខណ្ឌឫស្សីកែវ បានបង្ហាញនូវការអបអរសាទរ ជាមួ​​យ​ប្រជាពលរដ្ឋដែលទទួលបាននូវវិញ្ញាបនបត្រ សម្គាល់ម្ចាស់អចលនវត្ថុ របស់ខ្លួន។ លោក​អភិបាលខណ្ឌ បានលើកឡើងថា ការផ្តល់ជូនវិញ្ញាបនបត្រ សម្គាល់ម្ចាស់អចលនវត្ថុ ជូន​បង​ប្អូន​នា​ពេល​នេះ​គឺធានាបានភាពកក់ក្តៅ សុវត្ថិភាពដីធ្លី សិទ្ធិកាន់កាប់ដីធ្លីពេញលេញ ជាពិសេស ជា​ភស្តុតាង សម្រាប់ការពារជៀសវាងពីការរំលោភបំពាន និងទំនាស់ដីធ្លី ពេលកើតមានឡើង។

ជាមួយគ្នានេះ លោកអភិបាលខណ្ឌ បានអំពាវនាវ​ដល់​ប្រជាពលរដ្ឋ​ដែល​ទទួល​បាន​ប័ណ្ណ​កម្ម​សិទ្ធិ​នេះ ត្រូវថែរក្សាឱ្យបានល្អ កុំឱ្យខូចបាត់ជាផលប្រយោជន៍ ក្នុងការប្រើប្រាស់​តាម​ការ​ជាក់ស្តែង​ដើម្បី​លើក​ស្ទួយជីវភាពរបស់បងប្អូនកាន់តែប្រសើរឡើង ព្រមទាំងសូម​ថ្លែង​អំណរគុណ​ដល់​មន្ទីរ​រៀបចំ​ដែន​ដីនគរូបនីយកម្មសំណង់ និងសុរិយោដីរាជធានីភ្នំពេញ ជាពិសេសដឹងគុណដល់ សម្តេច​អគ្គ​មហាសេនាបតីតេជោ ហ៊ុន សែន អតីតនាយករដ្ឋមន្ត្រី ព្រមទាំងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាបច្ចុប្បន្ន ដែលបាន​ដាក់​ចេញ​នូវ​យុទ្ធ​សាស្ត្រ​បញ្ជកោណ-ដំណាក់កាលទី១ ដើម្បី កំណើនការងារ សមធម៌ ប្រសិទ្ធភាព និងចីរភាព ដោយ​បន្តផ្តោតជាសំខាន់លើ "ប្រសិទ្ធភាពសមិទ្ធកម្ម" ព្រមទាំង​បាន​ឧបត្ថម្ភ​គាំទ្រ​ទាំង​ផ្នែក​បច្ចេកទេស និងផ្នែកច្បាប់ក្នុងដំណើរការចុះបញ្ជីដីធ្លី នៅក្នុងភូមិសាស្ត្រ​រាជ​ធានីឱ្យ​មាន​ភាព​កាន់​តែ​ល្អប្រសើរឡើងបន្ថែមទៀត សម្រាប់ការផ្តល់បណ្ណកម្មសិទ្ធិជូនដល់ប្រជាពលរដ្ឋជាម្ចាស់ដី និង​អ្នក​កាន់​កាប់ដីទាំងឡាយ ដែលបានបំពេញគ្រប់លក្ខខណ្ឌ និងបទ​ដ្ឋាន​បច្ចេក​ទេស​ស្រប​តាម​ច្បាប់ និងបទដ្ឋានគតិយុត្តជាធរមាន ៕