ព្រឹទ្ធសភារបស់ប្រទេសអ៊ីតាលី បានផ្តល់ការអនុម័តចុងក្រោយកាលពីថ្ងៃអង្គារ (២៣ មេសា) ចំពោះផែនការរដ្ឋាភិបាលដ៏ប្រកួតប្រជែងក្នុងការអនុញ្ញាតឱ្យក្រុមដែល «គាំទ្រភាពជាម្តាយ» អាចចូលទៅក្នុងគ្លីនិករំលូតកូន ដើម្បីព្យាយាមរារាំងស្ត្រីដែលចង់បញ្ចប់ការមានផ្ទៃពោះ។

គណបក្សស្ដាំនិយម បងប្អូនអ៊ីតាលី (Brothers of Italy) របស់លោកស្រីនាយករដ្ឋមន្រ្តី ជីអូចា មេឡូនី (Giorgia Meloni) បានភ្ជាប់សំណើរនេះនៅក្នុងវិសោធនកម្មលើសេចក្ដីស្នើច្បាប់ស្តីពីផែនការស្តារឡើងវិញក្រោយកូវីដ១៩ របស់ទីក្រុងរ៉ូម ដែលរួមមានជំពូកដែលជំរុញដល់វិស័យសុខាភិបាល។

លោកស្រី មេឡូនី ប្រឆាំងនឹងការរំលូតកូនយ៉ាងម៉ឺងម៉ាត់ ប៉ុន្តែបានសន្យាក្នុងអំឡុងពេលយុទ្ធនាការបោះឆ្នោតសកលរបស់ខ្លូនដែលបានទទួលជ័យជម្នះក្នុងឆ្នាំ២០២២ ថា ទោះបីជាមានការមិនពេញចិត្តផ្ទាល់ខ្លួនក៏ដោយ ក៏លោកស្រីនឹងមិនផ្លាស់ប្តូរច្បាប់ដែលមានស្រាប់លើប្រធានបទនេះទេ។ គណបក្សរបស់លោកស្រី មេឡូនី និយាយថា ផែនការថ្មីនេះគឺមានគោលបំណងផ្តល់ឱកាសដល់ស្ត្រីសម្រាប់ការឆ្លុះបញ្ចាំងមុនពេលសម្រេចចិត្តចុងក្រោយអំពីការមានផ្ទៃពោះ ហើយនិងមិនប៉ះពាល់ដល់សិទ្ធិរបស់ពួកគេឡើយ។

ព្រឹទ្ធសភាបានអនុម័តសេចក្តីព្រាងច្បាប់អនុញ្ញាតឱ្យក្រុមប្រឆាំងការរំលូតកូនចូលទៅក្នុងគ្លីនិកផ្តល់ប្រឹក្សាក្រុមគ្រួសារជាសាធារណៈនេះ ដោយការបោះឆ្នោតគាំទ្រ ៩៥ ទល់នឹង ៦៨ សំឡេង ដែលបង្កឱ្យមានការរិះគន់យ៉ាងខ្លាំងក្លាក្នុងចំណោមគណបក្សប្រឆាំង ដែលហៅផែនការនេះថាការវាយប្រហារលើសិទ្ធិរំលូតកូនតាំងពីឆ្នាំ១៩៧៨៕