អវកាសយានិកចិន ៣នាក់ដែលនឹងបង្កើតក្រុមនាវិកនៃបេសកកម្មយានអវកាស Shenzhou-18 នាពេលខាងមុខ បានជួបជាមួយអ្នកសារព័ត៌មាន នៅថ្ងៃពុធ (ទី២៤ ខែមេសា) នេះ។

ភ្នាក់ងារអវកាសមានមនុស្សបញ្ជារបស់ចិន (CMSA) បានប្រកាសថា អវកាសយានិកលោក Ye Guangfu លោក Li Cong និងលោក Li Guangsu នឹងឡើងលើយានអវកាស Shenzhou-18 ដែលគ្រោងនឹងបាញ់បង្ហោះ នៅម៉ោង ២០:៥៩ ថ្ងៃព្រហស្បត្តិ៍ (ម៉ោងនៅទីក្រុងប៉េកាំង) ពីមជ្ឈមណ្ឌលបាញ់បង្ហោះផ្កាយរណប Jiuquan នៅភាគពាយព្យនៃប្រទេសចិន។

អ្នកទាំង៣ នឹងត្រូវបានស្វាគមន៍ដោយក្រុមនាវិករបស់យាន Shenzhou-17 ក្នុងគន្លងតារាវិថី ដែលបាននៅលើស្ថានីយអវកាស Tiangong ចាប់តាំងពីថ្ងៃទី២៦ ខែតុលាឆ្នាំមុន ហើយនឹងត្រឡប់មកផែនដីវិញ បន្ទាប់ពីបញ្ចប់បេសកកម្មរបស់ពួកគេ។

បេសកកម្មនេះ នឹងត្រូវបានបញ្ជាដោយអវកាសយានិកដែលមានបទពិសោធ លោក Ye Guangfu ដែលបានចូលរួមក្នុងបេសកកម្មហោះហើរអវកាស Shenzhou-13 ក្នុងឆ្នាំ២០២១ ខណៈដែលលោក Li Cong និងលោក Li Guangsu នឹងអនុវត្តការហោះហើរអវកាសជាលើកដំបូង។

យានអវកាស Shenzhou-18 ដែលស្ថិតនៅលើយានចម្លង Long March-2F ត្រូវបានបញ្ជូនទៅកាន់កន្លែងបាញ់បង្ហោះ កាលពីថ្ងៃទី១៧ ខែមេសា ដោយការត្រួតពិនិត្យមុខងារផ្សេងៗ មុនការបាញ់បង្ហោះ និងការធ្វើតេស្តរួមគ្នា ត្រូវបានធ្វើឡើង ដើម្បីធានាបាននូវការត្រៀមខ្លួនរបស់យានអវកាសនេះ៕