ម្ចាស់ និងអ្នកគ្រប់គ្រងនាវាកុងតឺន័រដ៏ធំ ដែលបានបុកស្ពាន Francis Scott Key ឲ្យរលំបាក់ នៅសហរដ្ឋអាមេរិក កាលពីខែមុន គួរតែទទួលខុសត្រូវទាំងស្រុង ចំពោះហេតុការណ៍ដ៏អាក្រក់ននេះ។ នេះបើយោងតាមឯកសារដែលបានដាក់ទៅតុលាការ កាលពីថ្ងៃចន្ទ (២២ មេសា) តំណាងឲ្យអភិបាលក្រុង និងក្រុមប្រឹក្សាទីក្រុង Baltimore។
គួរបញ្ជាក់ថា ក្រុមហ៊ុនទាំង២ បានដាក់ញត្តិភ្លាមៗ បន្ទាប់ពីមានការបាក់រលំនៅថ្ងៃទី២៦ ខែមីនានោះ ដោយសុំឲ្យតុលាការពិនិត្យមើលការទទួលខុសត្រូវរបស់ពួកគេក្រោមបទប្បញ្ញត្តិមុនសង្រ្គាមស៊ីវិលនៃច្បាប់សមុទ្រឆ្នាំ១៨៥១។ តុលាការសហព័ន្ធនៅរដ្ឋ Maryland ទីបំផុតនឹងសម្រេចថា តើអ្នកណាជាអ្នកទទួលខុសត្រូវ និងចំនួនទឹកប្រាក់ដែលពួកគេជំពាក់នូវអ្វីដែលអាចក្លាយជាគ្រោះមហន្តរាយផ្លូវទឹកធ្ងន់ធ្ងរបំផុតមួយ ក្នុងប្រវត្តិសាស្ត្រ។
ក្រុមហ៊ុន Grace Ocean Private Ltd ដែលមានមូលដ្ឋាននៅប្រទេសសិង្ហបុរី ជាម្ចាស់នាវា Dali ជានាវាដែលបើកចេញពីផ្លូវ ហើយបានទៅបុកចូលស្ពាននោះ។ ក្រុមហ៊ុន Synergy Marine Pte Ltd ដែលមានមូលដ្ឋាននៅប្រទេសសិង្ហបុរីដែរ គឺជាអ្នកគ្រប់គ្រងនាវានេះ។
នៅក្នុងឯកសាររបស់ពួកគេ កាលពីថ្ងៃចន្ទ មេធាវីតំណាងឲ្យទីក្រុងនេះ បានចោទប្រកាន់ក្រុមហ៊ុនពីការធ្វេសប្រហែស ដោយលើកហេតុផលថា ក្រុមហ៊ុនគួរតែដឹងថា នាវា Dali មិនស័ក្តិសមសម្រាប់ការធ្វើដំណើរនោះទេ ហើយត្រូវមានអ្នកបញ្ជានាវា ជានាវិកដែលមានសមត្ថភាពជាងនេះ។
យ៉ាងណាក្ដី អ្នកនាំពាក្យក្រុមហ៊ុនបាននិយាយកាលពីថ្ងៃចន្ទនោះថា វានឹងមិនសមរម្យក្នុងការធ្វើអត្ថាធិប្បាយលើវិវាទដែលកំពុងរង់ចាំដំណើរការផ្លូវច្បាប់នោះទេ៕