ប្រព័ន្ធផ្សព្វផ្សាយអ៊ីស្រាអែល បានរាយការណ៍កាលពីថ្ងៃពុធថា អ៊ីស្រាអែល បានត្រៀមខ្លួនរួចរាល់ហើយក្នុងការបញ្ជូនកងទ័ពចូលទៅក្នុងទីក្រុងរ៉ាហ្វា ( Rafah) ដែលទីក្រុងហ្កាហ្សាខ្លួនមើលឃើញថា ជាបន្ទាយចុងក្រោយរបស់ក្រុមហាម៉ាស ដោយនិយាយថា ការត្រៀមរៀបចំកំពុងដំណើរការ ដើម្បីជម្លៀសជនស៊ីវិលប៉ាឡេស្ទីនដែលភៀសខ្លួនដោយសង្រ្គាម បាននិងកំពុងស្នាក់ នៅទីនោះ។
សារព័ត៌មានអ៊ីស្រាអ៊ែល Hayom បាននិយាយថា ការបោសសម្អាតទីក្រុងរ៉ាហ្វា ដែលបានពន្យារពេលជាច្រើនសប្តាហ៍ ចំពេលមានជម្លោះជាមួយទីក្រុងវ៉ាស៊ីនតោន នឹងកើតឡើង ក្នុងពេលឆាប់ៗនេះ ដោយលើកឡើងពីការសម្រេចចិត្តរបស់រដ្ឋាភិបាលអ៊ីស្រាអែល បន្ទាប់ពីកិច្ចចរចាបទឈប់បាញ់ជាមួយក្រុមហាម៉ាស បានជាប់គាំង។
ប្រព័ន្ធផ្សព្វផ្សាយអ៊ីស្រាអែលមួយចំនួនទៀត បានរាយការណ៍ស្រដៀងគ្នានេះ។ វីដេអូមួយចំនួន បានកត់សម្គាល់នៅលើប្រព័ន្ធផ្សព្វផ្សាយសង្គមដែលហាក់ដូចជាបង្ហាញពីការដំឡើងទីក្រុងតង់សម្រាប់អ្នជម្លៀស ចេញពីទីក្រុងរ៉ាហ្វា។
ការិយាល័យនាយករដ្ឋមន្ត្រី លោក បេនចាមីន ណេតាន់យ៉ាហ៊ូ ( Benjamin Netanyahu) និងការិយាល័យអ្នកនាំពាក្យយោធាអ៊ីស្រាអែល មិនមានការអធិប្បាយភ្លាមៗទេ។
ដោយឆ្លងកាត់ព្រំដែនអេហ្ស៊ីប ចំនួនប្រជាជននៃទីក្រុងរ៉ាហ្វា បានកើនឡើងយ៉ាងច្រើន ដោយមានជនជាតិប៉ាឡេស្ទីនជាងមួយលាននាក់ ដែលបានភៀសខ្លួនចេញពីផ្នែកផ្សេងទៀតនៃតំបន់ហ្កាហ្សាស្ទ្រីប ក្នុងអំឡុងពេលសង្រ្គាមជាងកន្លះឆ្នាំនេះ។