ក្រសួងអភិវឌ្ឍន៍របស់ប្រទេសនេះ បាននិយាយកាលពីថ្ងៃពុធថា ប្រទេសអាល្លឺម៉ង់ បានយល់ព្រមគាំទ្រគំនិតផ្តួចផ្តើមការងារថ្មីសម្រាប់ជនជាតិប៉ាឡេស្ទីន នៅតំបន់វេសបែង (West Bank) ដែលកាន់កាប់ដោយអ៊ីស្រាអែល និងនៅទីក្រុងហ្ស៊េរុយសាឡឹម។

កិច្ចព្រមព្រៀងនេះ ត្រូវបានប្រកាស បន្ទាប់ពីកិច្ចប្រជុំរវាងរដ្ឋមន្ត្រីអភិវឌ្ឍន៍អាល្លឺម៉ង់ លោកស្រី Svenja Schulze និងនាយករដ្ឋមន្ត្រីថ្មីនៃអាជ្ញាធរប៉ាឡេស្ទីន លោក ម៉ូហាម៉េ មូស្តាហ្វា (Mohammed Mustafa) ។

ក្រសួងអាល្លឺម៉ង់ បាននិយាយថា៖«ភាពគ្មានការងារធ្វើនៅតំបន់វេសបែង បានកើនឡើងជិតបីដង ហើយបច្ចុប្បន្ន ឈរនៅចំនួន ៤០ភាគរយ»។

គោលដៅនៃគំនិតផ្តួចផ្តើមការងារ គឺបង្កើតការងារចំនួន ២៥.000 ក្នុងរយៈពេលបីឆ្នាំខាងមុខ ក៏ដូចជារក្សាការងារបច្ចុប្បន្នផងដែរ។

ក្រសួងអភិវឌ្ឍន៍ប្រទេសអាល្លឺម៉ង់ កំពុងវិនិយោគ ២៥លានអឺរ៉ូ (២៧លានដុល្លារ) នៅឆ្នាំនេះ ដើម្បីចាប់ផ្តើមកម្មវិធីនេះ។ ការផ្តល់មូលនិធិបន្ថែមទៀត គួរតែធ្វើឡើង ក្នុងឆ្នាំខាងមុខនេះ។

យោងតាមក្រសួងបានឲ្យដឹងថា ការវាយប្រហារកាលពីថ្ងៃទី៧ ខែតុលាដ៏បង្ហូរឈាមប្រឆាំងនឹងអ៊ីស្រាអែល ដែលបានចាប់ផ្តើមដោយក្រុមសកម្មប្រយុទ្ធប៉ាឡេស្ទីនហាម៉ាស និងការវាយលុកយោធារយៈពេលជាច្រើនខែ ជាបន្តបន្ទាប់របស់អ៊ីស្រាអែល នៅតំបន់ហ្កាហ្សាស្ទ្រីប បាននាំឲ្យស្ថានភាពសេដ្ឋកិច្ច នៅក្នុងទឹកដីប៉ាឡេស្ទីន កាន់តែយ៉ាប់យ៉ឺនឡើង។