នគរបាលអូស្ត្រាលីបានចាប់ខ្លួនក្មេងជំទង់ ៧នាក់ នៅក្នុងរលកនៃការវាយឆ្មក់ប្រឆាំងអំពើភេរវកម្ម នាថ្ងៃពុធ (ទី២៤ ខែមេសា) នេះ ដោយបណ្ដាមន្ត្រីជាន់ខ្ពស់អះអាងថា បណ្តាញនេះអាចគ្រោងធ្វើការវាយប្រហារ បន្ថែមពីលើការបង្កហានិភ័យគួរឲ្យស្អប់ស្ពើមដល់សាធារណជន។
មន្ត្រីជាង ៤០០នាក់ បានចូលរួមក្នុងប្រតិបត្តិការស្វែងរកនៅទីតាំងចំនួន ១៣កន្លែង ទូទាំងទីក្រុងស៊ីដនី បន្ទាប់ពីមានការវាយប្រហារលើសង្ឃជាន់ខ្ពស់ ១អង្គ នៅព្រះវិហារ Assyrian ដោយការចាក់នឹងកាំបិត តែមិនគ្រោះថ្នាក់ដល់ជីវិត កាលពីថ្ងៃទី១៥ ខែមេសា។
គួរបញ្ជាក់ថា ក្មេងប្រុសអាយុ ១៦ឆ្នាំម្នាក់ ត្រូវបានឃុំឃាំងរួចហើយ ជុំវិញការវាយប្រហារនោះ ប៉ុន្តែនគរបាលបាននិយាយថា យុវជនចំនួន ៧នាក់ផ្សេងទៀតដែលជាផ្នែកមួយនៃ «បណ្តាញសហការី និងមិត្តរួមការងារដ៏ធំទូលាយ» នោះ ឥឡូវនេះត្រូវបានចាប់ខ្លួន។
ស្នងការរងនគរបាលលោក Dave Hudson បាននិយាយថា ការតាមឃ្លាំមើល «យ៉ាងដិតដល់» លើបណ្តាញនេះ បានបង្កើតចេញជារូបភាពគួរឲ្យព្រួយបារម្ភ ដែលទាមទារឲ្យមានសកម្មភាពជាបន្ទាន់។ លោកបានប្រាប់អ្នកសារព័ត៌មានបន្ទាប់ពីការវាយឆ្មក់នោះថា៖ «ឥរិយាបថរបស់ពួកគេ អំឡុងពេលស្ថិតនៅក្រោមការតាមឃ្លាំមើលនេះ បាននាំឲ្យយើងជឿថា ប្រសិនបើពួកគេប្រព្រឹត្តអំពើណាមួយនោះ យើងនឹងមិនអាចទប់ស្កាត់បានឡើយ»។
ចំណែកអ្នកឯកទេសប្រឆាំងភេរវកម្មរបស់នគរបាលសហព័ន្ធអូស្ត្រាលី លោកស្រី Krissy Barrett បាននិយាយថា បណ្តាញនេះ «បានចែករំលែកមនោគមវិជ្ជាជ្រុលនិយមឃោរឃៅស្រដៀងៗគ្នា»។ តែទោះបីជានគរបាលជឿថា ការវាយប្រហារអាចកើតមានឡើងក៏ដោយ ក៏ជំនួយការស្នងការ លោកស្រី Barrett បាននិយាយថា រហូតមកដល់ពេលនេះ ពួកគេនៅមិនទាន់អាចរកឃើញភស្តុតាងណាមួយ ពាក់ព័ន្ធនឹង «ទីតាំង ពេលវេលា ឬគោលដៅជាក់លាក់» សម្រាប់ការវាយប្រហារនោះទេ៕