អ៊ីរ៉ង់ និងប៉ាគីស្ថាន បានអំពាវនាវឲ្យក្រុមប្រឹក្សាសន្តិសុខអង្គការសហប្រជាជាតិ នៅក្នុងសេចក្តីថ្លែងការណ៍រួមមួយដែលបានចេញផ្សាយកាលពីថ្ងៃពុធ ដើម្បីចាត់វិធានការប្រឆាំងនឹងអ៊ីស្រាអែល ដោយនិយាយថាប្រទេសនេះ បាន «ខុសច្បាប់» កំណត់គោលដៅទៅលើប្រទេសជិតខាង និងកន្លែងការទូតបរទេស។

សេចក្តីថ្លែងការណ៍រួមដែលត្រូវបានចេញផ្សាយដោយក្រសួងការបរទេសរបស់ប្រទេសប៉ាគីស្ថាន បានធ្វើឡើង បន្ទាប់ពីដំណើរទស្សនកិច្ចរយៈពេលបីថ្ងៃទៅកាន់ប្រទេសនេះ ដោយប្រធានាធិបតីអ៊ីរ៉ង់ អ៊ីប្រាហ៊ីម រ៉េស៊ី ( Ebrahim Raisi) នៅពេលមានភាពតានតឹងកាន់តែខ្លាំង នៅមជ្ឈិមបូព៌ា។

កាលពីថ្ងៃសុក្រកន្លងទៅ ការផ្ទុះនោះ ត្រូវបានគេឮនៅខាងលើទីក្រុង Isfahan របស់អ៊ីរ៉ង់ ជាអ្វីដែលប្រភពបាននិយាយថា ជាការវាយប្រហាររបស់អ៊ីស្រាអែល។ ទោះបីជាយ៉ាងណាក៏ដោយ ទីក្រុងតេអេរ៉ង់ បាននិយាយសម្រាលចំពោះឧប្បត្តិហេតុនេះ ហើយបានអះអាងថា ខ្លួនមិនមានផែនការសម្រាប់ការសងសឹកនោះទេ។

អ៊ីរ៉ង់ និងប៉ាគីស្ថាន បាននិយាយនៅក្នុងសេចក្តីថ្លែងការណ៍រួមរបស់ពួកគេថា៖« ដោយទទួលស្គាល់ថា ទង្វើគ្មានការទទួលខុសត្រូវរបស់កងកម្លាំងរបបអ៊ីស្រាអែល គឺជាការកើនឡើងភាពតានតឹងដ៏ធំមួយ នៅក្នុងតំបន់ដែលមានការប្រែប្រួលរួចហើយ ភាគីទាំងពីរ បានអំពាវនាវឲ្យក្រុមប្រឹក្សាសន្តិសុខអង្គការសហប្រជាជាតិ ទប់ស្កាត់របបអ៊ីស្រាអែលពីការផ្សងព្រេងក្នុងតំបន់នេះ និងអំពើខុសច្បាប់វាយប្រហារប្រទេសជិតខាងរបស់ខ្លួន»។ 

ប្រទេសជិតខាងមូស្លីម អ៊ីរ៉ង់ និងប៉ាគីស្ថាន កំពុងស្វែងរកការកែលម្អទំនាក់ទំនង បន្ទាប់ពីការវាយប្រហារដោយយោធាសងសឹកគ្នាដែលមិនធ្លាប់មានពីមុនមក ក្នុងឆ្នាំនេះ។

លោករ៉េស៊ី ដែលបានបញ្ចប់ដំណើរទស្សនកិច្ចរបស់ខ្លួន ហើយបានធ្វើដំណើរទៅកាន់ប្រទេសស្រីលង្កា នៅ ថ្ងៃពុធនេះ បានប្តេជ្ញាថា នឹងជំរុញពាណិជ្ជកម្មរវាងអ៊ីរ៉ង់ និងប៉ាគីស្ថានដល់ ១០ពាន់លានដុល្លារ ក្នុងមួយឆ្នាំ។