អាជ្ញាធរថៃបានចេញការព្រមានអំពីកម្ដៅក្ដៅខ្លាំងហួសហេតុ សម្រាប់ទីក្រុងបាងកក នៅថ្ងៃពុធ (ទី២៤ ខែមេសា) នេះ ដោយជំរុញឲ្យប្រជាជនស្នាក់នៅតែក្នុងផ្ទះ ដើម្បីសុវត្ថិភាពរបស់ពួកគេ ខណៈសីតុណ្ហភាពក្ដៅកាន់តែខ្លាំងឡើងៗ។

សីតុណ្ហភាពត្រូវបានគេព្យាករថា នឹងឡើងដល់ ៣៩អង្សាសេ នៅក្នុងតំបន់ដ៏ធំទូលាយនៃរដ្ឋធានីរបស់ថៃមួយនេះ ខណៈដែលសន្ទស្សន៍កម្ដៅបានឡើងលើសពី ៥២អង្សាសេដែលត្រូវបានអាជ្ញាធរក្រុងចាត់ថ្នាក់ថា ជាកម្ដៅ «ដ៏គ្រោះថ្នាក់ខ្លាំងបំផុត»។ គួរបញ្ជាក់ថា សន្ទស្សន៍កម្ដៅ គឺជារង្វាស់ពីសីតុណ្ហភាពជាក់ស្ដែង ដោយគិតទៅលើសំណើម ល្បឿនខ្យល់ និងកត្តាផ្សេងៗទៀត។

នាយកដ្ឋានបរិស្ថានរបស់អាជ្ញាធរក្រុងបាងកក បានសរសេរសារបង្ហោះនៅលើបណ្ដាញសង្គម Facebook ថា៖ «ការព្រមាន គឺថា សន្ទស្សន៍កម្ដៅថ្ងៃនេះ មានគ្រោះថ្នាក់ខ្លាំងបំផុត។ សូមមេត្តាចៀសវាងសកម្មភាពខាងក្រៅ។ សន្ទស្សន៍កម្ដៅត្រូវបានចាត់ថ្នាក់ថា មានគ្រោះថ្នាក់ខ្លាំងបំផុត នៅពេលដែលវាឡើងលើសពី ៥២អង្សាសេ»។

ខែមេសា ជាធម្មតាគឺជារយៈពេលដ៏ក្តៅ និងសើមបំផុតនៃឆ្នាំនៅក្នុងប្រទេសថៃ ប៉ុន្តែស្ថានភាពក្នុងឆ្នាំនេះ កាន់តែធ្ងន់ធ្ងរឡើងៗ ដោយសារបាតុភូតអាកាសធាតុ El Nino។

អាកាសធាតុដ៏ក្តៅហែងនេះ ត្រូវបានគេរំពឹងថា នឹងបន្តមាននៅប៉ុន្មានថ្ងៃខាងមុខនេះ ហើយរដ្ឋាភិបាលបានជំរុញឲ្យប្រជាជនរក្សាជាតិទឹកក្នុងខ្លួន លាបឡេការពារកម្ដៅថ្ងៃ និងហាត់ប្រាណក្នុងផ្ទះ ដើម្បីចៀសវាងសុរិយរោគ ឬការសន្លប់ដោយសារកម្ដៅ៕