មន្ត្រីបាននិយាយនៅថ្ងៃពុធនេះថា ប្រធានាធិបតីនេប៉ាល់ បានស្នើឲ្យមេដឹកនាំនៃប្រទេសកាតាដែលកំពុងបំពេញទស្សនកិច្ចរយៈពេលពីរថ្ងៃទៅកាន់ប្រទេសអាស៊ីខាងត្បូង ជួយដោះលែងនិស្សិតនេប៉ាល់ម្នាក់ ដែលត្រូវគេចាប់ជាចំណាប់ថ្នូរ ដោយក្រុមសកម្មប្រយុទ្ធប៉ាឡេស្ទីនហាម៉ាស ។

ប្រធានាធិបតីនេប៉ាល់លោក Ram Chandra Poudel បានជួបជាមួយលោក Sheik Tamim bin Hamad Al Thani នៅឯភូមិគ្រឹះរបស់លោកប្រធានាធិបតី ក្នុងរដ្ឋធានីកាត់ថ្មាន់ឌូ(Kathmandu)។

ទីប្រឹក្សាសារព័ត៌មានរបស់ប្រធានាធិបតីនេប៉ាល់ លោក Kiran Pokharel បានប្រាប់សារព័ត៌មាន APថា លោក Al Thani បាននិយាយថា លោកនឹងធ្វើអ្វីគ្រប់យ៉ាង ដែលអាចធ្វើទៅបាន ដើម្បីជួយដោះលែង និស្សិតឈ្មោះ Bipin Joshi។ 

លោក Joshi ស្ថិតក្នុងចំណោមនិស្សិតនេប៉ាល់ ១៧នាក់ ដែលកំពុងសិក្សាផ្នែកកសិកម្ម នៅតំបន់តាំងទីលំនៅ Alumim kibbutz ក្បែរតំបន់ហ្កាហ្សា នៅពេលដែលក្រុមហាម៉ាស បានវាយប្រហារអ៊ីស្រាអែលភាគខាងត្បូង កាលពីថ្ងៃទី៧ ខែតុលា។ សិស្ស១០នាក់ បានស្លាប់ និង៦នាក់ទៀត រងរបួស ខណៈលោក Joshi ត្រូវបាន ចាប់ពង្រត់ទៅកាន់តំបន់ហ្កាហ្សា។

ទោះបីជាមិនទាន់មានព័ត៌មានអំពីស្ថានភាពរបស់លោក Joshi  ឬកន្លែងណាក៏ដោយ ក៏មន្ត្រីនេប៉ាល់ បាននិយាយថា ពួកគេជឿថា រូបគេ នៅមានជីវិត នៅឡើយ។