ភ្នំពេញ ៖ កាលពីថ្ងៃទី២៤ ខែមេសា ឆ្នាំ២០២៤ មានសប្បុរសជន៩ស្ថាប័នផ្សេងគ្នា បានអញ្ជើញចូលរួមបរិច្ចាគថវិកាក្នុងឱកាស ខួបលើកទី១៦១ ទិវាពិភពលោកកាកបាទក្រហម ៨ឧសភា ឆ្នាំ២០២៤ ក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ»។ ក្រោមអធិបតីភាពលោកជំទាវបណ្ឌិត អ៊ុក ម៉ាលី អគ្គហេរញ្ញិក កាកបាទក្រហមកម្ពុជា នាទីស្នាក់ការកណ្តាល។

សប្បុរសជនដែលចូលរួមបរិច្ចាគរួមមាន៖ ទី១ក្រុមហ៊ុន ម៉ែន សារុន បានឧបត្ថម្ភថវិកាចំនួន ២០.០០០ដុល្លារ (ពីរម៉ឺនដុល្លារអាម៉េរិក), ទី២លោកជំទាវអ្នកឧកញ៉ា ម៉ៅ ចំណាន ភរិយាអ្នកឧកញ៉ា គិត ម៉េង អគ្គនាយកក្រុមហ៊ុន ROYAL GROUP ឧបត្ថម្ភថវិកា ៩៩៩.៩៩៩ ដុល្លារអាម៉េរិក, ទី៣ ឯកឧត្តម ឈិត សុខុន សមាជិកព្រឹទ្ធសភា និងលោកជំទាវ ឧបត្ថម្ភថវិកាចំនួន ៨.០០០.០០០រៀល (ប្រាំបីលានរៀល) ទី៤ ឯកឧត្តមបណ្ឌិត លី ឆេង ប្រធានក្រុមប្រឹក្សាភិបាល នៃសាកលវិទ្យាល័យ ប៊ែលធីអន្តរជាតិ និងលោកជំទាវ ឧបត្ថម្ភថវិកាចំនួន ៥.០០០ដុល្លារ (ប្រាំពាន់ដុល្លារអាម៉េរិក) ទី៥ឧកញ៉ា សុខ សំណាង និងលោកជំទាវ ស៊ីម សុនិមល ឧបត្ថម្ភថវិកាចំនួន ១០០.០០០ដុល្លារ (ដប់ម៉ឺនដុល្លារអាម៉េរិក) ទី៦លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី (ACLEDA Bank Plc.) និងលោកជំទាវ ឧបត្ថម្ភថវិកាចំនួន ៨០០.០០០.០០០រៀល(ប្រាំបីរយលានរៀល)ទី៧ក្រសួងព័ត៌មាន ដឹកនាំដោយលោកជំទាវ ទុយ សិរីរតនះ នេត្រ ភ័ត្រ្តា និងប្រតិភូភរិយាឥស្សរ ជនថ្នាក់ដឹកនាំអមដំណើរ សរុបចំនួន៣២លានរៀល និង៣២០០ដុល្លារ, ទី៨ ធានាគារកម្ពុជាសាធារណះ ឧបត្ថម្ភថវិកាចំនួន ៥.០០០ដុល្លារ (ប្រាំពាន់ដុល្លារអាម៉េរិក) និងទី៩ក្រុមសិក្ខាម នៃវគ្គបណ្តុះបណ្តាលមន្រ្តី កាកបាទក្រហមកម្ពុជា ជំនាន់ទី១ នៃសាលាភូមិន្ទរដ្ឋបាល បានឧបត្ថមថវិកាចំនួន ៨៤៩ ដុល្លារអាម៉េរិក និង ២,៩៤២,០០0 រៀល។

ក្នុងឱកាសនេះលោកជំទាវកិត្តិបណ្ឌិត អ៊ុក ម៉ាលី អគ្គហេរញ្ញិក កាកបាទក្រហមកម្ពុជា តំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានពាំនាំប្រសាសន៍ របស់សម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុនសែន ផ្តាំផ្ញើសួរសុខទុក្ខ និងថ្លែងអំណរគុណយ៉ាងជ្រាលជ្រៅបំផុត ចំពោះសប្បុរសជនទាំង៨ក្រុមខាងលើ ដែលបានចូលរួមបរិចា្ចគថវិកា ក្នុងឱកាសខួបលើកទី១៦១ ទិវាពិភពលោកកាកបាទក្រហម និងអឌ្ឍចន្ទក្រហម៨ឧសភា ឆ្នាំ២០២៤នេះ សម្រាប់កាកបាទក្រហមកម្ពុជា បានបន្តសកម្មភាពមនុស្សធម៌ទៅមុខទៀត។

លោកជំទាវអគ្គហេរញ្ញិក កាកបាទក្រហមកម្ពុជា បានឱ្យដឹងទៀតថា សម្រាប់ការកៀងគររកជំនួយឧបត្ថមទិវា៨ឧសភាឆ្នាំនេះ ដោយគិតត្រឹមថ្ងៃទី២៤ ខែមេសា ឆ្នាំ២០២៤ ថវិកាដែលទទួលបានពីសប្បុរសជន បានចំនួនជាង៥លានដុល្លារ អាម៉េរិកហើយ។ លោកជំទាវបន្តថាជំនួយដែលបានមកពីសប្បុរសធម៌ទាំងនេះ គឺបាកបាទក្រហមកម្ពុជា យកទៅជួយដល់អង្កការកុមាកំព្រា ជនមានពិការភាព ជនចាស់ជរាឥតទីពឹង ស្រ្តីមេម៉ាយកូនច្រើន អ្នកផ្ទុកមេរោគអេដស៍ និងប្រជាពលរដ្ឋដែលងាយរងគ្រោះបំផុត និងគ្រោះធម្មជាតិផ្សេងៗទៀត។ ជាក់ស្តែងដូចជានៅក្នុងរយៈពេលប៉ុន្មានថ្ងៃកន្លងមកនេះ គឺក្រុមកាងារកាកបាទក្រហមកម្ពុជា បាននាំយកអំណោយ និងថវិកាចែកជូនប្រជាពលរដ្ឋ ដែលងាយរងគ្រោះនៅតាម អង្កការ សមាគម មួយចំនួន ដែលត្រូវការជំនួយជាចាំបាច់។

ក្នុងឱកាសនោះសប្បុរជនទាំង៩ស្ថាប័នខាងលើ ពិតជាមានក្តីរំភើបសប្បាយរីករាយ និងអរគុណដល់កាកបាទក្រហមកម្ពុជា ដែលមានហ្លូងម៉ែ នរោត្តម មុនីនាថ សីហនុ ជាព្រះប្រធានកិត្តយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន ដែលផ្តល់ឱកាសឱ្យក្រុមការងារបានចែករំលែក និងចូលរួមបរិច្ចាគថវិកាមួយចំនួន ជូនកាកបាទក្រហមកម្ពុជា សម្រាប់ក្នុងឱកាសទិវា៨ឧសភា២០២៤នេះ ទុកជាជំនួយទៅដល់ប្រជាពលរដ្ឋ ដែលងាយរងគ្រោះបំផុត៕​

អត្ថបទៈ សំ ងីម​