ប្រធានាធិបតីអ៊ីរ៉ង់លោក Ebrahim Raisi បានទៅដល់ប្រទេសស្រីលង្កាហើយ នៅថ្ងៃពុធ (២៤ មេសា) ជាកន្លែងដែលលោកបានបើកជាផ្លូវការនូវគម្រោងវារីអគ្គិសនីតម្លៃ ៥១៤លានដុល្លារ។

គួរបញ្ជាក់ថា អ៊ីរ៉ង់បានយល់ព្រមសាងសង់គម្រោងថាមពលវារីអគ្គិសនី Uma Oya ក្នុងឆ្នាំ២០១០ ប៉ុន្តែមូលនិធិបានអស់ បន្ទាប់ពីបានបញ្ចេញ ៥០លានដុល្លារ ដោយសារសហរដ្ឋអាមេរិក បានទណ្ឌកម្មនៅចុងឆ្នាំនោះលើប្រទេសមជ្ឈិមបូព៌ាមួយនេះ ដែលធ្វើឲ្យមានការពិបាកក្នុងការផ្ទេរប្រាក់ ដោយបង្ខំឲ្យប្រទេសស្រីលង្កាជាអ្នកផ្តល់មូលនិធិដែលនៅសល់។

លើសពីពីនេះទៀត គម្រោងនេះក៏ជួបនឹងភាពរអាក់រអួលពីការពន្យារពេលផងដែរ ដោយសារតែជំងឺរាតត្បាតកូវីដ-១៩ ការព្រួយបារម្ភអំពីបរិស្ថាន និងការតវ៉ាពីអ្នកភូមិ។

ការិយាល័យប្រធានាធិបតីស្រីលង្កា បានឲ្យដឹងនៅក្នុងសេចក្តីថ្លែងការណ៍មួយថា គម្រោងនេះនឹងបន្ថែមថាមពល ២៩០GWh (ជីហ្គាវ៉ាត់ម៉ោង) ទៅកាន់បណ្តាញថាមពលជាតិ ខណៈដែលផ្គត់ផ្គង់ទឹកដល់ផ្ទៃដីស្រែចម្ការ ៦.០០០ហិចតា និងទឹកស្អាតដល់ប្រជាជនរាប់ពាន់គ្រួសារ នៅក្នុងស្រុកចំនួន៣៕