អធិការបតីអាល្លឺម៉ង់លោក Olaf Scholz នៅថ្ងៃពុធ (ទី២៤ ខែមេសា) នេះ បានស្វាគមន៍នាយករដ្ឋមន្ត្រីអង់គ្លេសលោក Rishi Sunak ដែលបានទៅដល់ទីក្រុងប៊ែរឡាំង ក្នុងដំណើរទស្សនកិច្ចលើកដំបូងរបស់លោកទៅកាន់ប្រទេសអាល្លឺម៉ង់ គិតចាប់តាំងពីចូលកាន់តំណែង ក្នុងខែតុលា ឆ្នាំ២០២២។
បើយោងតាមរដ្ឋាភិបាលអង់គ្លេស បានឲ្យដឹងថា អំឡុងការជួបគ្នា រវាងមេដឹកនាំទាំង២ គេរំពឹងថា លោក Scholz និងលោក Sunak នឹងប្រកាសផែនការបង្កើតប្រព័ន្ធកាំភ្លើងធំមានកង់គ្រប់គ្រងពីចម្ងាយ គឺ Howitzer Wheeled Artillery Systems ឬ RCH 155 ព្រមទាំងពិភាក្សាអំពីកិច្ចសហការលើគម្រោងថាមពល ក្នុងនោះរួមទាំងការវិនិយោគថាមពលរបស់អាល្លឺម៉ង់ផងដែរ។
ជាមួយគ្នានេះ លោក Sunak ក៏ត្រូវបានគេរំពឹងផងដែរថា នឹងព្យាយាមពង្រឹងទំនាក់ទំនងសន្តិសុខឲ្យកាន់តែជិតស្និទ្ធជាមួយប្រទេសអាល្លឺម៉ង់ ពោលគឺមានរយៈពេលត្រឹមតែ ១ថ្ងៃបន្ទាប់ពីលោកនាយករដ្ឋមន្ត្រីរូបនេះ បានប្រកាសថា លោកនឹងដំឡើងការចំណាយលើវិស័យការពារជាតិដល់ ២,៥ភាគរយនៃ GDP (ផលិតផលក្នុងស្រុកសរុប) ក្នុង ១ឆ្នាំ នៅឆ្នាំ២០៣០ ជាអ្វីដែលលោកបានលើកឡើងថា ជាបញ្ហាប្រឈមចំពោះបណ្តាប្រទេសអឺរ៉ុបផ្សេងទៀត ក្នុងការអនុវត្តតាម៕