ប្រធានាធិបតីជាប់ឆ្នោតឥណ្ឌូនេស៊ី លោក Prabowo Subianto នៅថ្ងៃពុធ (២៤ មេសា) នេះ បានប្តេជ្ញាថា លោកនឹងប្រឹងប្រែងដើម្បីប្រជាជនឥណ្ឌូនេស៊ីគ្រប់រូប និងបានអំពាវនាវឲ្យមានឯកភាពជាតិក្នុងចំណោមឥស្សរជននយោបាយ ដើម្បីដឹកនាំប្រទេសឆ្ពោះទៅមុខ ខណៈដែលលោកព្យាយាមពង្រឹងឥទ្ធិពលរបស់ខ្លួន នៅសភា មុនពេលចូលកាន់តំណែង ក្នុងខែតុលា។

អំឡុងពេលថ្លែងនៅឯពិធីមួយដែលរូបលោកត្រូវបានបញ្ជាក់ថា ជាអ្នកឈ្នះការបោះឆ្នោតថ្ងៃទី១៤ ខែកុម្ភៈនោះ លោក Prabowo ដែលទទួលបានជ័យជម្នះជាមួយសំឡេងដ៏ច្រើន បាននិយាយថា លោកកំពុងជជែកជាមួយឥស្សរជនក្នុងប្រទេស ហើយវាជារឿងសំខាន់សម្រាប់គណបក្សនានា ក្នុងការធ្វើការរួមគ្នាដើម្បីផលប្រយោជន៍រួម។

លោក Prabowo ដែលត្រូវបានគាំទ្រយ៉ាងស្ងាត់ស្ងៀមពីសំណាក់ប្រធានាធិបតីក្នុងតំណែង លោក Joko Widodo កំពុងស្វែងរកការពង្រីកសម្ព័ន្ធភាពរបស់លោក នៅក្នុងសភាថ្មី ហើយកំពុងពិភាក្សាជាមួយគណបក្សដែលគាំទ្រគូប្រជែងការបោះឆ្នោត។

លោក Prabowo បាននិយាយថា៖ «ខ្ញុំនឹងបង្ហាញឲ្យឃើញថា ខ្ញុំនឹងប្រឹងប្រែងដើម្បីប្រជាជនឥណ្ឌូនេស៊ីគ្រប់រូប ក្នុងនោះរួមទាំងអ្នកដែលមិនបានបោះឆ្នោតឲ្យខ្ញុំផងដែរ។ ប្រសិនបើឥណ្ឌូនេស៊ីចង់បន្តរស់រាន ពោលគឺក្លាយជាប្រទេសរីកចម្រើននោះ ឥស្សរជនទាំងអស់ត្រូវតែធ្វើការជាមួយគ្នា។ ប្រសិនបើយើងក្លាហានទុកការយល់ឃើញខុសគ្នាមួយឡែក កុំបណ្ដាយឲ្យអារម្មណ៍គ្រប់គ្រងយើង និងស្រឡាញ់ជាតិរបស់យើងនោះ យើងនឹងលះបង់ជាមួយគ្នាដើម្បីប្រជាជនរបស់យើង»។

សូមបញ្ជាក់ថា ការអះអាងពីជ័យជម្នះនេះត្រូវបានធ្វើឡើង ២ថ្ងៃបន្ទាប់ពីតុលាការធម្មនុញ្ញ បានច្រានចោលការតវ៉ាជំទាស់ពីបេក្ខជនចាញ់ឆ្នោត ២រូប ដែលស្វែងរកឲ្យមានការបោះឆ្នោតប្រធានាធិបតីឡើងវិញ និងការដកសិទ្ធិលោក Prabowo និងមិត្តរួមតំណែងរបស់លោក ដែលនេះមានន័យថា ជម្លោះការបោះឆ្នោតគ្រប់យ៉ាង ត្រូវបានបញ្ចប់៕