សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអះអាងថា រាជរដ្ឋាភិបាល​នឹងខិត​ខំ​ធ្វើយ៉ាងណាលុបបំបាត់ជំងឺគ្រុនចាញ់ឲ្យអស់ពីកម្ពុជានាពេលខាងមុខនេះ តាមរយៈ​ផ្តល់​សេវា​ធ្វើ​រោគ​វិនិច្ឆ័យ និងធ្វើព្យាបាលជំងឺគ្រុនចាញ់​នេះ​នៅ​ក្នុង​តំបន់​ឆ្ងាយ​ដាច់​ស្រយាល​ដែល​ពិបាក​ទៅដ​ល់ និងគ្រប់មនុស្សទាំងអស់កុំថាឡើយជនជាតិដើមភាគតិច។

នៅក្នុងសារលិខិតក្នុងឱកាសប្រារព្ធទិវាជាតិប្រយុទ្ធនឹងជំងឺគ្រុនចាញ់ ក្រោមប្រធានបទ «លើក​កម្ពស់​សមធម៌​សុខភាព សមភាពយេនឌ័រ និងសិទ្ធិមនុស្ស» ដើម្បីប្រយុទ្ធនឹងជំងឺគ្រុនចាញ់ នាថ្ងៃ​ទី២៥ ខែមេសា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បាន​លើក​ឡើង​ថា ក្នុងនាមរាជរដ្ឋាភិបាលនៃព្រះរាជាណាចក្រកម្ពុជា សម្តេចមានសេចក្តីសោមនស្សរីករាយ និង​សូមសម្តែងនូវការអបអរសាទរជាមួយប្រជាជាតិ និងពិភពលោកទាំងមូល ដែលប្រារព្ធ ទិវា​គ្រុន​ចាញ់​ពិភពលោក និងទិវាជាតិប្រយុទ្ធនឹងជំងឺគ្រុនចាញ់ នាថ្ងៃនេះ ដើម្បីជំរុញ និងលើក​ទឹក​ចិត្ត ​ដល់អ្នកពាក់ព័ន្ធគ្រប់លំដាប់ថ្នាក់ព្រមទាំងដៃគូអនុវត្ត និងដៃ​គូ​អភិវឌ្ឍ​រួមគ្នា​ពន្លឿន​ការ​អនុវត្ត​សកម្មភាព លុបបំបាត់ជំងឺគ្រុនចាញ់ទៅតាមផែនការយុទ្ធសាស្ត្រជាតិ​ឱ្យសម្រេចបាន​ជោគជ័យ​សម្រាប់​ប្រទេសកម្ពុជាគ្មានជំងឺគ្រុនចាញ់នៅឆ្នាំ២០២៥ និងបណ្តាប្រទេស​នៅក្នុ​ង​មហា​អនុ​តំបន់​មេគង្គ​គ្មាន​ជំងឺគ្រុនចាញ់នៅឆ្នាំ២០៣០។

សម្តេចធិបតីបាន លើកឡើងថាបើទោះបីជាជំងឺគ្រុនចាញ់ នៅតែយាយី​ដល់​អាយុ​ជីវិត​មនុស្ស​គ្រប់​ពេល និងបានធ្វើឱ្យខាតបង់ផលិតភាពយ៉ាងធ្ងន់ធ្ងរ បង្កផលប៉ះពាល់ដល់សុខភាពសាធារណៈ និង​សង្គម-សេដ្ឋកិច្ចរបស់ពិភពលោក និងប្រទេសកម្ពុជាក៏ដោយ ក៏ប្រទេស​កម្ពុជា​បាន​និង​កំពុង​តែ​ដើរ​លើ​ផ្លូវត្រូវ ដោយបានចូលរួមយ៉ាងសកម្មជាមួយពិភពលោកគាំទ្រ ការសម្រេច​គោល​ដៅ​គ្មាន​ជំងឺ​គ្រុនចាញ់ តាមរយៈការខិតខំប្រឹងប្រែង និងការប្តេជ្ញាចិត្តខ្ពស់ក្នុងការអនុវត្ត ផែនការ​យុទ្ធសាស្ត្រ​ជាតិ​លុបបំបាត់ជំងឺគ្រុនចាញ់ ឆ្នាំ២០១១-២០២៥ ដែលជាគំនិតផ្តួច​ផ្តើម​ដ៏​ថ្លៃ​ថ្លា​ប្រកប​ដោយ​បញ្ញាញាណរបស់ សម្តេចអគ្គមហាសេនាបតីតេជោ ហ៊ុន សែន អតីត​នាយករដ្ឋ​មន្ត្រី​នៃព្រះរាជាណាចក្រកម្ពុជា។

ក្នុង​បរិបទសុខសន្តិភាព ស្ថិរភាពនយោបាយ សេរីភាព សាមគ្គីភាព សេចក្តីថ្លៃថ្នូរ និងវឌ្ឍនភាព​ទូទាំង​ប្រទេស​កម្ពុជាបានធ្វើដំណើរកាន់តែខិតទៅជិតដល់ការលុបបំបាត់ជំងឺគ្រុនចាញ់គ្រប់ទម្រង់ ត្រឹម​ឆ្នាំ២០២៥នេះ តាមរយៈសមិទ្ធផលសំខាន់ៗ ដែលរា​ជ​រដ្ឋាភិបាល​ត្រូវ​ធ្វើ​ដោយ​ក្នុង​នោះ​រួម​មាន​ការ​ទប់ស្កាត់មិនឱ្យមានភាពស៊ាំនឹងថ្នាំសម្លាប់មេរោគ គ្រុនចាញ់ចាប់តាំងពីឆ្នាំ២០១៦ និង​ការ​បន្ត​ថយចុះនៃចំនួនករណីជំងឺគ្រុនចាញ់ ដោយនៅឆ្នាំ២០២៣ មាន ត្រឹមតែ ១ ៣៨៤ ករណី ប៉ុណ្ណោះ ព្រមទាំងគ្មានអ្នកស្លាប់ដោយសារជំងឺគ្រុនចាញ់ចាប់តាំងពីឆ្នាំ២០១៨ រហូត មក​ដល់​បច្ចុប្បន្ន​។

សម្តេចធិបតីនាយករដ្ឋមន្រ្តីបានអះអាងថា «ទន្ទឹមនឹងវឌ្ឍនភាព និង​សមិទ្ធផល​ជោគ​ជ័យ​ទាំង​នេះ ​យើងមិនត្រូវភ្លេចខ្លួនទេថា យើងពុំទាន់សម្រេច គោលដៅ​ផែនការ​លុប​បំបាត់​ជំងឺ​គ្រុន​ចាញ់​ទាំង​ស្រុង​នៅ​ឡើយ ដោយនៅមានបញ្ហាប្រឈមចម្បងៗដែលយើងត្រូវ តែខិតខំរួមគ្នា​ដោះ​ស្រាយ​ និងបង្កើនល្បឿនអនុវត្តផែនការសកម្មភាពការងារលុបបំបាត់ជំងឺគ្រុនចាញ់ ដំណាក់​កាល​ទី២​ ឆ្នាំ២០២១-២០២៥ ជាពិសេសត្រូវផ្តោតលើការផ្តល់សេវាធ្វើរោគវិនិច្ឆ័យ និងការព្យាបាល ករណី​ជំងឺ​គ្រុនចាញ់ ដែលនៅសេសសល់ក្នុងតំបន់ឆ្ងាយដាច់ស្រយាលពិបាកទៅដល់ និង​ប្រជាជន​ចល័ត ប្រជាជនក្រីក្រ ស្ត្រីមានផ្ទៃពោះ កុមារតូច​ៗ​ព្រម​ទាំង​ជន​ជាតិ​ដើម​ភាគ​តិច​ដែល​ប្រឈម​នឹង​ហានិភ័យខ្ពស់ ដោយមិនប្រកាន់ពណ៌សម្បុរ ភេទ ពូជសាសន៍ សាសនា ស្ថានភាព​សង្គម-សេដ្ឋកិច្ច ឬស្ថានភាពផ្សេងៗទៀត ប្រកបដោយគុណភាព ស័ក្តិសិទ្ធិភាព សមធម៌ និង​បរិយាបន្ន»។

ក្នុងករណីនេះសម្តេចធិបតីបានបន្ថែមទៀតថាត្រូវបន្តសកម្មភាពលើកកម្ពស់ ការយល់​ដឹង​របស់​សាធារណ​ជនការផ្លាស់ប្តូរផ្នត់គំនិត និងទម្លាប់តាមរយៈការធ្វើឱ្យសហគមន៍មានអនាម័យល្អ បរិស្ថាន​ស្អាត ការពារកុំឱ្យមូសខាំ ដែលមិនត្រឹមតែជាវិធានការបង្ការជំងឺដ៏មានប្រសិទ្ធភាពនោះទេ ប៉ុន្តែ​ក៏ជា សិទ្ធិរបស់ប្រជាជនគ្រប់រូបដែលត្រូវទទួលបានផងដែរ។

នៅក្នុង​សារលិខិតនេះសម្តេចធិបតីនាយករដ្ឋមន្រ្តី ក៏បានប្រកាសសម្តែងនូវការកោតសរសើរ និង​គាំទ្រយ៉ាងពេញទំហឹងដល់គ្រប់សកម្មភាពទាំងអស់ ដែលបាន​និង​កំពុង​អនុវត្ត​ក្នុង​ដំណើរ​ឆ្ពោះ​ទៅ​រក​កម្ពុជា​គ្មានជំងឺគ្រុនចាញ់ នៅឆ្នាំ២០២៥ និងពិភពលោកគ្មាន​ជំងឺ​គ្រុន​ចាញ់​ដើម្បី​លើក​កម្ពស់​សុខភាព​ និងសុខុមាលភាពប្រជាជន ដែលនឹងរួមចំណែកដល់ការអភិវឌ្ឍសង្គម-សេដ្ឋកិច្ច​ការ​លើក​កម្ពស់​សិទ្ធិមនុស្សនិងសមភាពយេនឌ័រ ដែលបានរំលេចក្នុងយុទ្ធសាស្ត្របញ្ចកោណ-ដំណាក់​កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា។

ជាមួយគ្នា​នោះដែរសម្តេចធិបតី ក៏បានថ្លែងអំណរគុណជាអនេកប្បការដល់ភាគីពាក់ព័ន្ធទាំងអស់ ទាំងក្នុង​និង​ក្រៅប្រទេស ដែលជាដៃគូអភិវឌ្ឍ និងដៃគូវិនិយោគរួមទាំងក្រសួងសុខាភិបាល មជ្ឈ​មណ្ឌ​លជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ មន្ត្រី​បុគ្គលិក​សុខាភិបាល ក្រុមការងារលុបបំបាត់ជំងឺគ្រុនចាញ់អាជ្ញាធរមូលដ្ឋាន អ្នកស្ម័គ្រចិត្ត និងប្រជាជន​គ្រប់​រូប​ដែល​បាន​រួម​គ្នា​ធ្វើ​ឱ្យ​សម្រេច​បាន​នូវជោគជ័យ​គួរ​ជាទីមោទនៈ​លើសកម្មភា​ព​ការងារ​លុប​បំបាត់​ជំងឺ​គ្រុនចាញ់នេះផងដែរ៕ អត្ថបទ៖ បាន ចក់