វិស័យឯកជនគាំទ្រពេញទំហឹង ចំពោះគម្រោងព្រែកជីកហ្វូណនតេជោ ក្រោមការគិតគូរដ៏ខ្ពង់ខ្ពស់របស់រាជរដ្ឋាភិបាល ដោយរំពឹងថា គម្រោងនេះនឹងលេចរូបរាងក្នុងពេលខាងមុខ សម្រាប់ជួយជំរុញដល់ការធ្វើពាណិជ្ជកម្ម និងវិស័យកសិកម្មនៅកម្ពុជាបន្ថែម។
ឧកញ៉ា ស៊ិន ចន្ធី ប្រធានសមាគមភស្ដុភារកម្មកម្ពុជា លើកឡើងនៅក្នុងកិច្ចសម្ភាសន៍ជាមួយសារព័ត៌មាន ស្តីពីគម្រោងព្រែក ជីកហ្វូណនតេជោ នេះថា ទាក់ទងនឹងការដឹកជញ្ជូនទំនិញនៅកម្ពុជា បន្ទាប់ពីការដឹកជញ្ជូនចូលដល់កំពង់ផែ ក្នុងនោះចំពោះការដឹក ជញ្ជូនបន្តចូលទីផ្សារក្នុងស្រុក កម្ពុជាបានអនុវត្តការដឹកជញ្ជូនតាមផ្លូវគោកទាំងស្រុង ដោយភាគច្រើនគឺការដឹកជញ្ជូនដោយរថយន្ត និងមានមុខទំនិញមួយចំនួនតូច បានដឹកជញ្ជូនតាមរថភ្លើង។ ចំណែកការដឹកជញ្ជូនសម្រាប់ទីផ្សារនាំចេញវិញ កម្ពុជាបានអនុវត្តដូច គ្នានឹងការនាំចូលផងដែរ ដោយការដឹកជញ្ជូនរបៀបនេះមានថ្លៃដើមខ្ពស់។
ដោយឡែកគម្រោងបង្កើតផ្លូវទឹករបស់រាជរដ្ឋាភិបាល, ឧកញ៉ា ស៊ិន ចន្ធី បានថ្លែងនូវការគាំទ្រពេញទំហឹង ចំពោះគំនិតផ្តូច ផ្តើមនៃគម្រោងបង្កើតផ្លូវទឹកព្រែកជីកនេះឡើង ដែលតភ្ជាប់ពីទន្លេទៅកាន់សមុទ្រខេត្តកែប នឹងមានក្តីរំពឹងថា គម្រោងនេះនឹងលេចរូប រាងក្នុងពេលខាងមុខ ក្នុងនោះប្រសិនមានផ្លូវទឹកចាក់ចូលដល់ទីផ្សារក្នុងស្រុក វាគឺជាសរសៃរឈាមដ៏សំខាន់របស់កម្ពុជា ហើយក៏ជាច្រកសេដ្ឋកិច្ចថ្មីមួយទៀតរបស់កម្ពុជា ដែលនឹងអាចជំរុញការដឹកជញ្ជូនបានលឿនជាងមុនទាន់ពេលវេលា និងកាត់បន្ថយការ ចំណាយថ្លៃដើមខ្ពស់ ហើយតាមរយៈនេះ គឺជាផ្នែកមួយជួយគាំទ្រដល់ការការធ្វើពាណិជ្ជកម្មបន្ថែម ជាពិសេសវិស័យកសិកម្ម បរិស្ថាន និងការកាត់បន្ថយការរងផលប៉ះពាល់ខូចខាតផ្លូវ ស្ពានផងដែរ។
ជុំវិញគម្រោងព្រែកជីកនេះដែរ, ឯកឧត្តម ថងលុន ស៊ីសុលីត ប្រធានរដ្ឋឡាវ នៅក្នុងជំនួបពិភាក្សាការងារជាមួយសម្តេចតេជោ ហ៊ុន សែន ប្រធានព្រឹទ្ធសភា ក្នុងអំឡុងពេលលោកមកបំពេញទស្សនកិច្ចផ្លូវរដ្ឋពីរថ្ងៃនៅកម្ពុជា បានបង្ហាញការគាំទ្រចំពោះគម្រោងដឹក ជញ្ជូន តាមផ្លូវទឹកហ្វូណនតេជោរបស់កម្ពុជា ដែលភ្ជាប់ពីទន្លេបាសាក់ទៅកាន់សមុទ្រ។ ពាក់ព័ន្ធនឹងគម្រោងព្រែកជីកហ្វូណនតេជោ នេះ, សម្ដេចតេជោ ហ៊ុន សែន មានប្រសាសន៍ថា គម្រោងនេះ បានអនុវត្តតាមច្បាប់ អន្តរជាតិត្រឹមត្រូវ ក្នុងនោះកម្ពុជាបានជូនដំណឹង អំពីព័ត៌មានលម្អិតអំពីព្រែកជីកនេះ ទៅគណៈកម្មការទន្លេមេគង្គផងដែរ។
សូមបញ្ជាក់ថា គម្រោងព្រែកជីកហ្វូណនតេជោ គឺជាគម្រោងតភ្ជាប់ផ្លូវទឹករវាងទន្លេ ទៅកាន់សមុទ្ររបស់កម្ពុជា ដោយឆ្លងកាត់ខេត្ត កណ្តាល តាកែវ កំពត និងកែប ប្រវែងប្រមាណ ១៨០ គីឡូម៉ែត្រ។ គម្រោងនេះគ្រោងចំណាយទុនប្រមាណ ១ ៧០០ លានដុល្លារ អាមេរិក ដោយបានសិក្សាគម្រោងល្អិតល្អន់រួចរាល់ បើតាមការគ្រោងទុក, គម្រោងព្រែកជីកជាប្រវត្តិសាស្ត្រនេះ នឹងចាប់ផ្តើមបើកការ ដ្ឋានសាងសង់នៅខែមិថុនា ឬខែកក្កដា ខាងមុខនេះ៕ អត្ថបទ៖ សុន រ៉ាឌី