បន្ទាប់ពីប្រធានាធិបតីអាមេរិកលោក Joe Biden បានចុះហត្ថលេខាលើច្បាប់ដែលអាចបញ្ចប់ដំណើរការនៃបណ្ដាញសង្គម TikTok ក្នុងទីផ្សារសហរដ្ឋអាមេរិកនោះ ទីក្រុងប៉េកាំងត្រូវតែសម្រេចជ្រើសរើសវិធីល្អបំផុត ដើម្បីសងសឹកចំពោះការវាយប្រហារលើក្រមហ៊ុនដែលមានតម្លៃបំផុតរបស់ពិភពលោកមួយនេះ។
ច្បាប់ដែលបានអនុម័តកាលពីថ្ងៃពុធ (ទី២៤ ខែមេសា) នឹងផ្តល់រយៈពេលជិត ១ឆ្នាំដល់ក្រុមហ៊ុនមេរបស់ចិន គឺ ByteDance Ltd. ឲ្យលក់វេទិកាចែករំលែកវីដេអូរបស់ខ្លួន មុនពេលប្រឈមនឹងការហាមឃាត់ទាំងស្រុង។ នៅឯសន្និសីទសារព័ត៌មានប្រចាំថ្ងៃ ប៉ុន្មានម៉ោងមុននោះ ក្រសួងការបរទេសចិន បានចង្អុលបង្ហាញអ្នកសារព័ត៌មានពីការប្ដេជ្ញារបស់មន្ត្រីពាណិជ្ជកម្ម កាលពីខែមីនា ក្នុងការចាត់វិធានការ «ដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួន»។
រហូតមកដល់ពេលនេះ រដ្ឋាភិបាលរបស់ប្រធានាធិបតីចិន លោក Xi Jinping (ស៊ី ជីនពីង) បានបង្ហាញពីការអត់ធ្មត់ ក្នុងការឆ្លើយតបទៅនឹងរលកនៃការទប់ស្កាត់ពាណិជ្ជកម្មរបស់សហរដ្ឋអាមេរិក ក្នុងរដូវកាលបោះឆ្នោតដ៏ក្ដៅគគុកនេះ។ ការអត់ធ្មត់របស់បក្សកុម្មុយនីស្តចិននេះកាន់តែមានភាពងាយស្រួល ដោយសារជម្រើសរបស់លោក Biden លើសកម្មភាពសំខាន់ៗជាច្រើន ដូចជាការយកពន្ធលើដែកដែលចិននាំចេញក្នុងបរិមាណតិចតួចទៅអាមេរិក។
ការធ្វើឲ្យ TikTok ឬម្ចាស់ជនជាតិចិនរបស់បណ្ដាញសង្គមនេះ ចេញពីសហរដ្ឋអាមេរិក អាចប្រឈមនឹងការតបតតាមកម្រិតនោះ។ មន្ត្រីជាច្រើនរូប ក្នុងឆ្នាំ២០២៣ បានបង្ហាញឆន្ទៈរបស់ពួកគេ ក្នុងការឆ្លើយតបទៅតាមកម្រិត ចំពោះយុទ្ធនាការរបស់សហរដ្ឋអាមេរិក ក្នុងការធ្វើឲ្យខ្សោយនូវលទ្ធភាពចូលប្រើប្រាស់របស់ទីក្រុងប៉េកាំង ចំពោះឧបករណ៍អេឡិចត្រូនិកកម្រិតខ្ពស់ ជាឧទាហរណ៍ ដោយចាប់ផ្តើមស៊ើបអង្កេតទៅលើក្រុមហ៊ុនផលិតបន្ទះឈីបអង្គចងចាំរបស់អាមេរិក គឺក្រុមហ៊ុន Micron Technology។
នាយកប្រតិបត្តិបច្ចេកវិទ្យាភូមិសាស្ត្រនៅក្រុមហ៊ុន Eurasia Group លោកស្រី Xiaomeng Lu បាននិយាយថា៖ «ប្រទេសចិនកំពុងរក្សាជម្រើសបើកចំហ នាពេលនេះ»។ ប៉ុន្តែលោកស្រីបានសង្កត់ធ្ងន់ថា ប្រសិនបើ TikTok អស់ជម្រើសផ្នែកផ្លូវច្បាប់របស់ខ្លួន ហើយពិតជាត្រូវចាកចេញពីអាមេរិកមែននោះ «ម៉ាកបច្ចេកវិទ្យាអាមេរិកមួយចំនួនអាចប្រឈមនឹងហានិភ័យ ក្នុងការក្លាយជាអ្នករងគ្រោះនៃវដ្តចក្រសងសឹកគ្នានេះ។
គួរបញ្ជាក់ថា ការរឹតបន្តឹងលើអ៊ីនធឺណិតរបស់ទីក្រុងប៉េកាំងបានបង្ខំឲ្យក្រុមហ៊ុនបណ្ដាញសង្គមអាមេរិកភាគច្រើនចាកចេញពីទីផ្សាររបស់ចិនរួចហើយ ដូចជា Meta Platforms និង Snap ជាដើម។ តែយ៉ាងណាក្ដី សកម្មភាពណាមួយរបស់ចិន ទំនងជានឹងព្យាយាមចៀសឲ្យបាន ក្នុងការបង្កការខូចខាតដល់សេដ្ឋកិច្ចរបស់ខ្លួន ខណៈដែលអ្នកបង្កើតគោលនយោបាយប្រឹងប្រយុទ្ធនឹងវិបត្តិអចលនទ្រព្យ ដែលកំពុងថ្លឹងថ្លែងលើកំណើន រួមជាមួយនឹងតម្រូវការក្នុងស្រុកដែលមានស្ថានភាពខ្សោយទៅៗ៕