យោងតាមរូបភាពពីផ្កាយរណបដែលសារព័ត៌មាន Reuters ទទួលបាន បានបង្ហាញឲ្យឃើញថា ប្រទេសចិន កំពុងផ្តល់កន្លែងចតសម្រាប់នាវាដឹកទំនិញរុស្ស៊ីដែលត្រូវបានដាក់ទណ្ឌកម្ម ដោយសហរដ្ឋអាមេរិកពាក់ព័ន្ធនឹងការបញ្ជូនសព្វាវុធរបស់កូរ៉េខាងជើងទៅកាន់ប្រទេសរុស្ស៊ី ខណៈដែលការព្រួយបារម្ភរបស់សហរដ្ឋអាមេរិកកើនឡើង ចំពោះការគាំទ្ររបស់ទីក្រុងប៉េកាំង ក្នុងសង្គ្រាមរបស់ទីក្រុងមូស្គូ នៅអ៊ុយក្រែន។
វិទ្យាស្ថានស្រាវជ្រាវ RUSI របស់ចក្រភពអង់គ្លេស បានឲ្យដឹងថា នាវារុស្ស៊ី Angara ដែលតាំងពីខែសីហា ឆ្នាំ២០២៣ បានផ្លាស់ទៅកាន់កំពង់ផែរុស្ស៊ី ដោយកុងតឺន័ររាប់ពាន់កុងតឺន័រ ត្រូវបានគេជឿថា មានផ្ទុកគ្រាប់បែករបស់កូរ៉េខាងជើងនោះ ត្រូវបានបោះយុថ្កាចតនៅកន្លែងចំណតនាវារបស់ចិន ក្នុងខេត្ត Zhejiang ភាគខាងកើត ចាប់តាំងពីខែកុម្ភៈ។
វត្តមានរបស់នាវានេះ នៅឯកំពង់ផែចិន បានបង្ហាញពីបញ្ហាប្រឈមដែលសហរដ្ឋអាមេរិក និងសម្ព័ន្ធមិត្តរបស់ខ្លួន កំពុងជួបប្រទះ នៅពេលពួកគេព្យាយាមរារាំងការគាំទ្រផ្នែកយោធា និងសេដ្ឋកិច្ចសម្រាប់រុស្ស៊ី។
ដោយអ៊ុយក្រែន ស្ថិតក្រោមការវាយលុករបស់រុស្ស៊ីជាថ្មី និងកំពុងខ្វះខាតគ្រាប់រំសេវ មន្ត្រីអាមេរិក បានចេញការព្រមានកាន់តែខ្លាំងឡើងអំពីអ្វីដែលពួកគេនិយាយថា ជាជំនួយរបស់ចិន ក្នុងការកសាងយោធារបស់រុស្ស៊ីឡើងវិញ បន្ទាប់ពីជួបការលំបាកពីដំបូង ក្នុងសង្គ្រាមអ៊ុយក្រែននេះ។
ការគាំទ្រនោះ ត្រូវបានគេរំពឹងថា នឹងឈានដល់កំពូលរបៀបវារៈ នៅសប្តាហ៍នេះ ខណៈដែលរដ្ឋមន្ត្រីការបរទេសលោក Antony Blinken ធ្វើទស្សនកិច្ច នៅទីក្រុងប៉េកាំង។ អ្នកការទូតលំដាប់ទី២ របស់ក្រសួងការបរទេសលោក Kurt Campbell បាននិយាយនៅខែនេះថា ទីក្រុងវ៉ាស៊ីនតោននឹងមិន «អង្គុយស្ងៀម» ប្រសិនបើទីក្រុងប៉េកាំងបង្កើនការគាំទ្ររបស់ខ្លួនដល់ទីក្រុងម៉ូស្គូ។
ស្ថានទូតចិនប្រចាំទីក្រុងវ៉ាស៊ីនតោន បាននិយាយថា ខ្លួនមិនបានដឹងអំពីព័ត៌មានលម្អិតដែលទាក់ទងនឹងនាវា Angara នោះទេ។ ហើយក្រសួងការបរទេសចិន ក៏បានប្រាប់ដែរថា ខ្លួនមិនមានព័ត៌មានអំពីបញ្ហានេះទេ៕