ម្ចាស់ជ័យលាភីណូបែល នាង Malala Yousafzai នៅថ្ងៃព្រហស្បតិ៍ (២៥ មេសា) បានថ្កោលទោសអ៊ីស្រាអែល និងបញ្ជាក់ជាថ្មីនូវការគាំទ្ររបស់នាងចំពោះប៉ាឡេស្ទីន នៅតំបន់ហ្កាហ្សា បន្ទាប់ពីមានប្រតិកម្មនៅក្នុងប្រទេសកំណើតប៉ាគីស្ថានរបស់នាង ចំពោះតន្ត្រី Broadway ដែលនាងបានផលិតរួមគ្នាជាមួយអតីតរដ្ឋមន្ត្រីការបរទេសអាមេរិកលោកស្រី Hillary Clinton។

នាង Yousafzai ដែលបានទទួលរង្វាន់ណូបែលសន្តិភាព ក្នុងឆ្នាំ២០១៤ ត្រូវបានថ្កោលទោសដោយមនុស្សមួយចំនួន សម្រាប់ការចាប់ដៃគូជាមួយលោកស្រី Clinton ដែលជាអ្នកគាំទ្រនិយាយឥតលាក់លៀមនៃសង្រ្គាមរបស់អ៊ីស្រាអែលប្រឆាំងនឹងក្រុមហាម៉ាស។

តន្ត្រីដែលមានចំណងជើងថា «Suffs» ពណ៌នាអំពីយុទ្ធនាការបោះឆ្នោតរបស់ស្ត្រីអាមេរិក សម្រាប់សិទ្ធិបោះឆ្នោតក្នុងសតវត្សទី២០ ហើយបានប្រគុំនៅទីក្រុងញូវយ៉ក តាំងពីសប្តាហ៍មុន។

នាង Yousafzai បានសរសេរនៅលើបណ្ដាញសង្គម X ដែលជាអតីត Twitter ថា៖ «ខ្ញុំចង់ឲ្យមិនមានការភ័ន្តច្រឡំអំពីការគាំទ្ររបស់ខ្ញុំ សម្រាប់ប្រជាជនហ្កាហ្សានោះទេ។ យើងមិនត្រូវការឃើញសពបន្ថែមទៀត ការទម្លាក់គ្រាប់បែកលើសាលារៀន និងកុមារអត់ឃ្លាន។ ដូច្នេះ សូមយល់ថា បទឈប់បាញ់ គឺជាការបន្ទាន់ និងចាំបាច់»។ 

នាងបានបន្ថែមថា៖ «ខ្ញុំបាន ហើយនឹងបន្តថ្កោលទោសរដ្ឋាភិបាលអ៊ីស្រាអែល ចំពោះការរំលោភច្បាប់អន្តរជាតិ និងឧក្រិដ្ឋកម្មសង្គ្រាម»។

សូមរំលឹកថា នាង Yousafzai បានទទួលរង្វាន់ណូបែលសន្តិភាព បន្ទាប់ពីរូបនាងត្រូវបានបាញ់ចំក្បាលដោយពួកតាលីបង់ប៉ាគីស្ថាន ខណៈដែលនាងជំរុញឲ្យមានការអប់រំដល់នារីនៅវ័យជំទង់ ក្នុងឆ្នាំ២០១២៕