ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានប្រកាសថា ស្ត្រីម្នាក់នៅក្នុងខេត្តសៀមរាប គឺជាបុគ្គលទី៧លានដែលទទួលបានវ៉ាក់សាំងបង្ការជំងឺកូវីដ-១៩ នៅក្នុងយុទ្ធនាការចាក់វ៉ាក់សាំងទូទាំងប្រទេស។
សម្ដេចតេជោ ហ៊ុន សែន បានប្រកាសឱ្យដឹងបែបនេះនៅលើទំព័រហ្វេសប៊ុករបស់សម្ដេចនៅយប់នេះ ដោយបញ្ចាក់ថា កម្ពុជាបានចាក់វ៉ាក់សាំងដល់ប្រជាពលរដ្ឋបាន ៧លាននាក់ហើយនៅត្រឹមថ្ងៃនេះ។
ប្រមុខរាជរដ្ឋាភិបាលកម្ពុជា ក៏បានឱ្យដឹងផងដែរថា អ្នកស្រី ចាន់ ឃីម រស់នៅឯភូមិកន្ត្រក ស្ថិតក្នុងសង្កាត់ស្វាយដង្គំ ក្រុងសៀមរាប ខេត្តសៀមរាប គឺជាបុគ្គលលំដាប់ទី ៧លាន ដែលទទួលបានវ៉ាក់សាំងបង្ការជំងឺកូវីដ-១៩។
សម្ដេចតេជោ ហ៊ុន សែន បញ្ជាក់ថា អ្នកស្រី ចាន់ ឃីម នឹងទទួលបានថវិកាចំនួន ១០លានរៀល និងសម្ភារៈផ្សេងទៀត ដែលនឹងប្រគល់ជូនដោយលោកជំទាវ ឱ វណ្ណឌីន។
គិតត្រឹមថ្ងៃនេះ កម្ពុជាសម្រេចការចាក់វ៉ាក់សាំងដល់ប្រជាពលរដ្ឋបាន ៧០ភាគរយហើយ បើធៀបនឹងគោលដៅរបស់រាជរដ្ឋាភិបាលកម្ពុជាដែលត្រូវចាក់ជូនប្រជាជនចំនួន ១០លាននាក់៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
