ក្រុមមន្ត្រី បាននិយាយថា នាវាមួយគ្រឿងដែលធ្វើដំណើរ ក្នុងឈូងសមុទ្រ Aden បានរងការវាយប្រហារនៅថ្ងៃព្រហស្បតិ៍នេះ ជាការវាយលុកថ្មីបំផុត ទំនងជាធ្វើឡើងដោយក្រុមឧទ្ទាមហ៊ួទីនៅយេម៉ែន ជុំវិញ     សង្គ្រាមដែលកំពុងបន្តរបស់អ៊ីស្រាអែលលើក្រុមហាម៉ាស នៅតំបន់ហ្កាហ្សាស្ទ្រីប។

ការវាយប្រហារនេះ កើតឡើង បន្ទាប់ពីយោធាអាមេរិក បាននិយាយនៅព្រឹកថ្ងៃព្រហស្បតិ៍នេះថា នាវាចម្បាំងសម្ព័ន្ធមិត្ត បានបាញ់ទម្លាក់មីស៊ីលរបស់ក្រុមហ៊ួទីដែលហោះសំដៅទៅនាវាមួយគ្រឿង កាលពីថ្ងៃមុន នៅជិតតំបន់ដូចគ្នា។ ក្រុមហ៊ួទី បានអះអាងថា ការវាយប្រហារកាលពីថ្ងៃពុធ ដែលបានកើតឡើង បន្ទាប់ពីការវាយប្រហារមួយចំនួនរបស់ក្រុមឧទ្ទាមលើការដឹកជញ្ជូន នៅក្នុងតំបន់ជុំវិញសង្គ្រាមដែលកំពុងបន្តរបស់អ៊ីស្រាអែលលើក្រុមហាម៉ាស នៅតំបន់ហ្កាហ្សាស្ទ្រីប។

មជ្ឈមណ្ឌលប្រតិបត្តិការពាណិជ្ជកម្មដែនសមុទ្ររបស់ចក្រភពអង់គ្លេស បាននិយាយថា នៅក្នុងការវាយប្រហារ នៅថ្ងៃព្រហស្បតិ៍នេះ នាវាមួយគ្រឿង ត្រូវបានគេកំណត់គោលដៅត្រឹមតែចម្ងាយជាង ១៥ម៉ាយ (២៥គីឡូម៉ែត្រ) ភាគនិរតីនៃទីក្រុងAden។ ពុំមានព័ត៌មានភ្លាមៗផ្សេងទៀតអំពីការវាយប្រហារនេះ ដែលត្រូវបានរាយការណ៍ដោយក្រុមហ៊ុនសន្តិសុខឯកជន Ambrey ផងដែរ។

ក្រុមហ៊ួទី មិនបានអះអាងពីការវាយប្រហារភ្លាមៗនោះទេ បើទោះបីជាធម្មតា ខ្លួនត្រូវចំណាយពេលជាច្រើនម៉ោង ដើម្បីទទួលស្គាល់ការវាយប្រហារមួយក៏ដោយ។

ក្រុមហ៊ួទី បានបើកការវាយប្រហារច្រើនជាង ៥០ដង លើការដឹកជញ្ជូន រឹបអូសនាវាមួយគ្រឿង និង           បានពន្លិចនាវាមួយគ្រឿងទៀត ចាប់តាំងពីខែវិច្ឆិកាមក នេះបើយោងតាមរដ្ឋបាលដែនសមុទ្ររបស់សហរដ្ឋអាមេរិក។