រដ្ឋាភិបាលអង់គ្លេស បានប្រកាសកាលពីថ្ងៃពុធ ខណៈដែលលោកនាយករដ្ឋមន្ត្រី រីស៊ី ស៊ុណាក់ (Rishi Sunak) បានធ្វើទស្សនកិច្ចនៅទីប៊ែរឡាំងថា អាល្លឺម៉ង់ និងអង់គ្លេស គ្រោងនឹងរួមគ្នាផលិតកាំភ្លើងផ្លោង ដែលបញ្ជាពីចម្ងាយ សម្រាប់ប្រតិបត្តិការជើងគោករបស់យោធា នាពេលអនាគត។

កិច្ចខិតខំប្រឹងប្រែងរួមគ្នា នឹងអភិវឌ្ឍន៍«ប្រព័ន្ធកាំភ្លើងធំធុន១៥៥មិល្លីម៉ែត្រ ដែលបញ្ជាពីចម្ងាយ (RCH 155) ដែលនឹងត្រូវបានបំពាក់ជាមួយរថយន្ត Boxer ពីក្រុមហ៊ុនផលិតរថក្រោះអាល្លឺម៉ង់ Krauss-Maffei Wegmann (KMW) នេះបើយោងតាមសេចក្តីថ្លែងការណ៍ពីសភាអង់គ្លេស។

កាំភ្លើងផ្លោងនេះ អាចបាញ់គ្រាប់ធុន១៥៥មិល្លីម៉ែត្របានដល់ទៅ ៩គ្រាប់ ក្នុងមួយនាទី ក្នុងរយៈចម្ងាយរហូតដល់ ៤០គីឡូម៉ែត្រ។

សេចក្តីថ្លែងការណ៍របស់សភាអង់គ្លេស បានបន្ថែមថា RCH 155 គឺជាកាំភ្លើងផ្លោងដំបូងគេបង្អស់របស់ពិភពលោកដែលមានសមត្ថភាពបាញ់ ហោះបានចម្ងាយឆ្ងាយ ហើយវាថែមទាំងអាចគេចចេញពីការបាញ់ប្រហាររបស់សត្រូវទៀតផង។

ដំណើរទស្សនកិច្ចទៅកាន់ទីក្រុងប៊ែរឡាំង គឺជាដំណើរទស្សនកិច្ចលើកដំបូងទៅកាន់ប្រទេសអាល្លឺម៉ង់សម្រាប់លោក ស៊ុណាក់ ដែលបានឡើងកាន់តំណែង ចាប់តាំងពីខែតុលា ឆ្នាំ ២០២២។ លោក បានមកដល់ទីក្រុងប៊ែរឡាំង កាលពីល្ងាចថ្ងៃអង្គារ បន្ទាប់ពីដំណើរទស្សនកិច្ចទៅកាន់រដ្ឋធានីវ៉ាសូវីរបស់ប្រទេស     ប៉ូឡូញ។