ប្រទេសបង់ក្លាដែស នៅថ្ងៃព្រហស្បតិ៍ (ទី២៥ ខែមេសា) នេះ បានធ្វើមាតុភូមិនិវត្តន៍នៃពលរដ្ឋមីយ៉ាន់ម៉ាចំនួន ២៨៨នាក់ដែលបានភៀសខ្លួនចេញពីជម្លោះដែលកំពុងបន្តមាននៅក្នុងប្រទេសរបស់ពួកគេ។
យោងតាមប្រព័ន្ធផ្សព្វផ្សាយក្នុងស្រុក បានឲ្យដឹងថា ក្នុងចំណោមពលរដ្ឋមីយ៉ាន់ម៉ាទាំងនោះ ភាគច្រើនគឺជាបុគ្គលិកយោធាដែលបានរត់គេចពីប្រទេសរបស់ពួកគេ អំឡុងពេលមានសង្រ្គាមផ្ទៃក្នុងជាមួយពួកបំបែកខ្លួន នៅក្នុងរដ្ឋ Rakhine។
ពួកគេត្រូវបានឆ្មាំល្បាតព្រំដែនបង់ក្លាដែសដឹកតាមនាវា ក្នុងដំណើរវិលត្រឡប់ទៅសហភាពមីយ៉ាន់ម៉ាវិញនៅថ្ងៃព្រហស្បតិ៍នេះ។ មនុស្សជាច្រើនពាក់សម្លៀកបំពាក់ប្រពៃណី និងអាវយឺត ហើយកាន់ថង់ប្លាស្ទិកតូចៗ ខណៈដែលពួកគេតម្រង់ជួររង់ចាំឡើងលើនាវាដែលមានការយាមកាមយ៉ាងតឹងរ៉ឹង នៅក្នុងទីក្រុង Cox's Bazar។
គួរបញ្ជាក់ដែរថា កាលពីដើមខែកុម្ភៈ ទាហាន និងមន្ត្រីមីយ៉ាន់ម៉ាប្រហែល ៣៣០នាក់ដែលភៀសខ្លួនចេញពីជម្លោះដូចគ្នានោះ ក៏ត្រូវបានធ្វើមាតុភូមិនិវត្តន៍ពីទីក្រុង Cox's Bazar នេះផងដែរ។
ការប្រយុទ្ធគ្នាជាបន្តបន្ទាប់ រវាងកងកម្លាំងយោធាមីយ៉ាន់ម៉ា និងក្រុមប្រដាប់អាវុធបំបែកខ្លួន ក្នុងនោះរួមទាំងកងទ័ព Arakan ក្នុងរដ្ឋ Rakhine បានកើតមានកាន់តែខ្លាំងឡើងៗ ក្នុងប៉ុន្មានខែមុននេះ ដោយក្រុមបំបែកខ្លួនបានដណ្ដើមកាន់កាប់ភាគច្រើននៃតំបន់ជាប់ព្រំដែន៕