ប្រធានាធិបតីជាប់ឆ្នោតឥណ្ឌូនេស៊ីលោក Prabowo Subianto នៅថ្ងៃព្រហស្បតិ៍ (ទី២៥ ខែមេសា) នេះ ទទួលបានកម្លាំងជំរុញដ៏ធំមួយ បន្ទាប់ពីគណបក្សនយោបាយដ៏លេចធ្លោមួយដែលបានគាំទ្របេក្ខជនម្នាក់ផ្សេងទៀត បានសន្យាថា នឹងគាំទ្រដល់រដ្ឋបាលរបស់លោក ដែលនេះកំពុងធ្វើឲ្យលោកបោះជំហានកាន់តែកៀកនឹងការទទួលបានសំឡេងភាគច្រើនក្នុងសភាថ្មី។

បន្ទាប់ពីជួបជាមួយលោក Prabowo ប្រធានគណបក្សលោក Surya Paloh បានប្រាប់អ្នកសារព័ត៌មាន គណបក្ស NasDem ជាមួយនឹងសំឡេងឆ្នោតគាំទ្រ ១០ភារយ នៅក្នុងការបោះឆ្នោតសភាខែកុម្ភៈ បានត្រៀមខ្លួនជាស្រេចក្នុងការសន្យាផ្ដល់ «ការគាំទ្រទាំងស្រុង» របស់ខ្លួន សម្រាប់រដ្ឋបាលបន្ទាប់។

តែយ៉ាងណាក្ដី លោកប្រធានរូបនេះមិនបាននិយាយឲ្យបានច្បាស់លាស់ថា តើគណបក្ស NasDem នឹងចូលរួមក្នុងរដ្ឋាភិបាលចម្រុះ ឬទេ។ គណបក្សមួយនេះបានគាំទ្រគូប្រជែងរបស់លោក Prabowo ដែលទទួលបានចំណាត់ថ្នាក់លេខ២ គឺលោក Anie Baswedan ដែលជាអតីតអភិបាលក្រុងហ្សាការតា។

គួរបញ្ជាក់ថា អ្នកនយោបាយជើងចាស់លោក Prabowo បានឈ្នះការបោះឆ្នោតជាមួយនឹងសំឡេងក្នុងចំនួនដ៏ច្រើន នៅក្នុងការប៉ុនប៉ងប្រជែងតំណែងប្រធានាធិបតីជាលើកទី៣ របស់លោក ហើយលោកនឹងចូលកាន់តំណែង នៅខែតុលា៕