ទីក្រុង New Delhi នៅថ្ងៃព្រហស្បតិ៍ (២៥ មេសា) នេះ បាននិយាយថា ខ្លួនមិនបានផ្ដល់សារៈសំខាន់អ្វីឡើយ ចំពោះរបាយការណ៍របស់ក្រសួងការបរទេសសហរដ្ឋអាមេរិកដែលរិះគន់សិទ្ធិមនុស្ស នៅក្នុងប្រទេសឥណ្ឌា ហើយបានហៅរបាយការណ៍នោះថា មានភាពលម្អៀងខ្លាំងណាស់។
គួរបញ្ជាក់ថា ការវាយតម្លៃសិទ្ធិមនុស្សប្រចាំឆ្នាំដែលបានចេញផ្សាយនៅដើមសប្តាហ៍នេះ បានរកឃើញការរំលោភបំពាន «ធំៗ» ជាច្រើន នៅក្នុងរដ្ឋ Manipur ភាគឦសានរបស់ឥណ្ឌា កាលពីឆ្នាំមុន រួមជាមួយនឹងការវាយប្រហារលើជនជាតិភាគតិច អ្នកសារព័ត៌មាន និងសំឡេងប្រឆាំង នៅកន្លែងផ្សេងទៀត ក្នុងប្រទេស។
នៅពេលដែលត្រូវបានសួរអំពីរឿងនេះ នាថ្ងៃព្រហស្បតិ៍នេះ អ្នកនាំពាក្យក្រសួងការបរទេសឥណ្ឌា លោក Randhir Jasiwal បានប្រាប់អ្នកសារព័ត៌មានថា៖ «របាយការណ៍នោះ តាមការយល់របស់យើង គឺមានភាពលម្អៀងខ្លាំងណាស់ ហើយវាឆ្លុះបញ្ចាំងឲ្យឃើញពីការយល់ដឹងដ៏កម្សោយបំផុត អំពីប្រទេសឥណ្ឌា»។ លោក Jaiswal បានបន្ថែមថា៖ «យើងមិនបានផ្ដល់សារៈសំខាន់អ្វីឡើយ ចំពោះរបាយការណ៍នេះ ហើយជំរុញឲ្យអ្នកទាំងអស់គ្នាកុំចាប់អារម្មណ៍នឹងវាអី»។
ខណៈពេលដែលឥណ្ឌា និងសហរដ្ឋអាមេរិកមានភាពជាដៃគូរឹងមាំ ហើយទីក្រុងវ៉ាស៊ីនតោនចង់បានទីក្រុង New Delhi ធ្វើជាយុទ្ធសាស្ត្រទប់ទល់នឹងប្រទេសចិននោះ ទំនាក់ទំនងរវាងប្រទេសទាំង២ បានជួបប្រទះនឹងបញ្ហាបន្តិចបន្តួច នាពេលថ្មីៗនេះ៕