ភ្នំពេញ៖ ប្រមុខរាជរដ្ឋាភិបាលកម្ពុជាសម្ដេចតេជោ ហ៊ុន សែន បានសម្រេចបិទខ្ទប់ខេត្តចំនួន ៨ ស្ថិតនៅជាប់ព្រំដែនកម្ពុជា-ថៃ រយៈពេល ២សប្ដាហ៍ ដើម្បីទប់ស្កាត់ការឆ្លងរាលដាលនៃមេរោគកូវីដ-១៩ប្រភេទឌែលតា (Delta)។
ប្រមុខរាជរដ្ឋាភិបាលបានសម្រេចបែបនេះនៅក្នុងសេចក្ដីសម្រេចទើបតែចេញនៅយប់នេះ ដែលបញ្ជាក់ថា វិធានការបិទខ្ទប់នេះ ចាប់ផ្ដើមអនុវត្តចាប់ពីថ្ងៃស្អែកនេះ រហូតដល់ថ្ងៃទី១២ ខែសីហាខាងមុខនេះ។
ខេត្តទាំង ៨ ដែលត្រូវដាក់ឱ្យស្ថិតក្រោមវិធានការបិទខ្ទប់ មានខេត្តកោះកុង ពោធិ៍សាត់ បាត់ដំបង ប៉ៃលិន បន្ទាយមានជ័យ ឧត្ដរមានជ័យ ព្រះវិរហារ និងខេត្តសៀមរាប។
នៅក្នុងសេចក្ដីសម្រេចនេះ រាជរដ្ឋាភិបាល បានណែនាំទៅរដ្ឋបាលខេត្តទាំង ៨ ឱ្យរៀបចំបែងចែកភូមិសាស្ត្ររបស់ខ្លួនទៅជា ៣តំបន់ មាន«តំបន់ក្រហម» «តំបន់លឿងទុំ» និង«តំបន់លឿង»។
រាជរដ្ឋាភិបាលកម្ពុជាក៏បានអនុញ្ញាតឱ្យរដ្ឋបាលខេត្តទាំង ៨ អាចចាត់វិធានការនានា ដើម្បីរឹតត្បិតការធ្វើដំណើរការចេញ-ចូលឆ្លងកាត់ខេត្ត ការជួបជុំ ឬការប្រមូលផ្ដុំមនុស្ស សកម្មភាពអាជីវកម្ម មុខរបរ និងបម្រាមគោរផងដែរ។
សម្ដេចតេជោ ហ៊ុន សែន បានសម្រេចអនុវត្តវិធានការបិទខ្ទប់នៅលើខេត្តទាំង ៨នេះ បន្ទាប់ពីកម្ពុជាបានរកឃើញមនុស្សរហូតដល់ ១១៤នាក់ហើយ បានឆ្លងមេរោគកូវីដ-១៩ប្រភេទឌែលតា គិតចាប់តាំងពីថ្ងៃទី៣១ ខែមីនាកន្លងមក។
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
