នាយករដ្ឋមន្ត្រីប្រទេសតង់ហ្សានី លោក ខាស៊ីម ម៉ាចាលីវ៉ា (Kassim Majaliwa) បានប្រាប់សភាកាលពីថ្ងៃព្រហស្បតិ៍ (២៥ មេសា) ថាទឹកជំនន់ដ៏គំហុកយ៉ាងធ្ងន់ធ្ងរដែលបង្កឡើងដោយភ្លៀងធ្លាក់ខ្លាំង បានបណ្តាលឱ្យមនុស្ស ១៥៥ នាក់ស្លាប់ និងមនុស្ស ២៣៦ នាក់ផ្សេងទៀតរងរបួស។
លោក ម៉ាចាលីវ៉ា បានប្រាប់សភានៅរដ្ឋធានី ដូដូម៉ា (Dodoma) ថាទឹកជំនន់ដ៏គំហុកត្រូវបានគេរាយការណ៍ថាកើតមាននៅក្នុងតំបន់ចំនួន ១៤ ក្នុងចំណោមតំបន់ទាំង ២៦ នៅក្នុងប្រទេសតង់ហ្សានីដីគោក ដែលប៉ះពាល់ដល់មនុស្សចំនួន ២០០.០០០ នាក់ និងបំផ្លាញលំនៅឋានចំនួន ១០.០០០ ខ្នង។
លោកបន្តថា «ហេដ្ឋារចនាសម្ព័ន្ធសាលារៀន ដំណាំកសិកម្ម ផ្លូវថ្នល់ ស្ពាន មណ្ឌលថែទាំសុខភាព និងបសុសត្វបានរងផលប៉ះពាល់ដោយទឹកជំនន់។ រដ្ឋាភិបាលបានចាត់វិធានការក្នុងគោលបំណងការពារស្ថានភាពមហន្តរាយបន្ថែមទៀត ដូចជាការបញ្ជាឱ្យបិទសាលារៀននៅក្នុងតំបន់ដែលរងផលប៉ះពាល់យ៉ាងធ្ងន់ធ្ងរដោយទឹកជំនន់»។
លោកនាយករដ្ឋមន្ត្រីរូបនេះបន្ថែមថា ទីភ្នាក់ងារផ្លូវជាតិតង់ហ្សានី, ទីភ្នាក់ងារផ្លូវជនបទ និងទីក្រុង, និងសាជីវកម្មផ្លូវដែក ត្រូវបានបញ្ជាឱ្យធ្វើការវាយតម្លៃជាបន្ទាន់លើផ្លូវថ្នល់ និងផ្លូវដែកដែលរងការខូចខាតសម្រាប់ការជួសជុលជាបន្ទាន់។
យោងតាមអាជ្ញាធរឧតុនិយមតង់ហ្សានី បានឱ្យដឹងថា ភ្លៀងធ្លាក់ខ្លាំងដែលរងឥទ្ធិពលដោយលក្ខខណ្ឌអាកាសធាតុ អ៊ែលនីញ៉ូ (El-Nino) បែបនេះត្រូវបានគេរំពឹងថានឹងបន្តរហូតដល់ខែឧសភា៕