ភ្នំពេញ៖ ក្នុងឱកាសដឹកនាំកិច្ចប្រជុំពេញអង្គគណៈរដ្ឋមន្រ្ដីនាព្រឹកថ្ងៃទី២៦ ខែមេសា ឆ្នាំ ២០២៤នេះ នៅវិមានសន្ដិភាព សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានប្រកាសផ្ដល់បណ្ណសរសើរ និងឧបត្ថម្ភថវិកាចំនួន ២០០លានរៀលដល់ខេត្តចំនួន ៦ ដែលគ្មានគ្រោះថ្នាក់ចរាចរណ៍ក្នុងពេល បុណ្យចូលឆ្នាំខ្មែរកន្លងទៅនេះ។
មុននឹងចាប់ផ្តើមកិច្ចប្រជុំពេញអង្គគណៈរដ្ឋមន្ត្រីសម្ដេចធិបតី នាយករដ្ឋមន្រ្ដីបានថ្លែងកោតសរសើរចំពោះអាជ្ញាធរខេត្ត កម្លាំងសមត្ថកិច្ចគ្រប់លំដាប់ថ្នាក់ទូទាំងប្រទេសបានរៀបចំពិធី បុណ្យចូលឆ្នាំថ្មីប្រពៃណីជាតិខ្មែរកន្លងមកបានល្អ ធ្វើឲ្យប្រជាពលរដ្ឋរដ្ឋសប្បាយរីករាយ គ្រប់ទីកន្លែងគ្មានបងធំក្មេងទំនើងមិនមានការបង្កអសន្តិសុខដល់សង្គមជាតិ។
សម្ដេចតេជោបានសង្កេតឃើញមាន ៦ ខេត្ត គ្មានគ្រោះថ្នាក់ចរាចរណ៍ក្នុងពេល បុណ្យចូលឆ្នាំខ្មែរកន្លងមក។ មានខេត្តព្រៃវែង កោះកុង កំពង់ឆ្នាំង ប៉ៃលិន មណ្ឌលគីរី និង ខេត្តត្បូងឃ្មុំ នឹងទទួលបានបណ្ណសរសើររបស់រាជរដ្ឋាភិបាល ១ និងថវិកា ២០០លានរៀល ភេសជ្ជៈ១០០០កេស។