ក្នុងរយៈពេល២ថ្ងៃ ចាប់ពីថ្ងៃទី២៥ និងថ្ងៃទី២៦ ខែមេសានេះ បណ្តាគរុនិស្សិតបរិញ្ញាបត្រជាន់ខ្ពស់អប់រំវិជ្ជាជីវៈគ្រូបង្រៀនកម្រិតឧត្តម (បរិញ្ញាបត្រ+២)ជំនាន់ទី២ នៃវិទ្យាស្ថានជាតិអប់រំ NIE បានរៀបចំតាំងពិព័រណ៌អប់រំស្តីពីស្នាដៃស្រាវជ្រាវ១១៣ប្រធានបទ ដែលភាគច្រើនជាកម្រងកិច្ចតែងការបង្រៀន អាចយកទៅបង្រៀនសិស្សវិទ្យាល័យតាមបែបយុគសម័យការរីកចម្រើនបច្ចេកវិទ្យាឌីជីថល។
បណ្តាគរុនិស្សិត បរិញ្ញាបត្រ +២ ថ្លែងថា គ្រប់ស្នាដៃគរុនិស្សិតបានសិក្សាស្រាវជ្រាវយកមកដាក់តាំងបង្ហាញនៅពេលនេះ ភាគច្រើន ជាគំនិតច្នៃប្រឌិត បង្កើតថ្មីសម្រាប់ការបង្រៀន ហើយបានរៀបចំតាក់តែងចងក្រងដាក់ក្នុងសៀវភៅកិច្ចតែងការបង្រៀន ការបង្កើតសម្ភារៈ ឧបទេសបង្រៀនពិសោធន៍ក្នុងស្រុក ហើយយើងប្តេជ្ញា យកវិធីសាស្ត្រការបង្រៀនសិស្សតាមបែបថ្មី យកទៅបង្រៀនសិស្សកម្រិតវិទ្យាល័យឲ្យមានគុណភាព ចំណេះដឹងខ្ពស់ និងជាធនធានមនុស្សដ៏ប្រសើរសម្រាប់ អនាគតប្រទេសជាតិ។
ឯកឧត្តមសៀង សុវណ្ណា នាយកវិទ្យាស្ថានជាតិអប់រំ ថ្លែងថា អំឡុងពេលនិស្សិតបរិញ្ញាបត្រជាន់ខ្ពស់អប់រំវិជ្ជាជីវៈគ្រូបង្រៀនកម្រិតឧត្តម ឬហៅថា បរិញ្ញាបត្រ+២ កំពុងសិក្សា ស្រាវជ្រាវការអប់រំ និងការបង្រៀននេះ គឺវិទ្យាស្ថានជាតិអប់រំ បានបណ្តុះគរុនិស្សិតឲ្យមានគំនិតច្នៃប្រឌិត និងនវានុវត្តជាច្រើនឆ្លើយតបទៅនឹងការបង្រៀនសិស្ស ក្នុងយុគសម័យឌីជីថល និងស្របតាមការធ្វើបច្ចុប្បន្នភាពលើការអប់រំនៅកម្ពុជា ជាពិសេសកំណែទម្រង់គ្រូបង្រៀន, ស្តង់ដារវិជ្ជាជីវៈគ្រូបង្រៀន, និងការផ្តោតលើអនាគតរបស់ប្រទេសជាតិជាដើម។
សូមបញ្ជាក់ថា ក្នុងកម្មវិធីតាំងពិពរ័រណ៍អប់រំបង្ហាញស្នាដៃស្រាវជ្រាវការបង្រៀននេះ មានគរុនិស្សិត NIEជំនាន់ទី២ ចូលរួមសរុប ៧៦៥នាក់ ស្រី ៣៦៨នាក់ បានយកស្នាដៃស្រាវជ្រាវវិធីសាស្ត្ររៀន និងបង្រៀនសរុប១១៣ប្រធានបទ ដាក់តាំងបង្ហាញ មុនពេលគរុនិស្សិតទាំងនោះ នឹងក្លាយខ្លួនទៅជាគ្រូបង្រៀនកម្រិតឧត្តម ចេញទៅបម្រើការងារនៅតាមបណ្ដាវិទ្យាល័យនានាក្នុងទូទាំងប្រទេស នៅឆ្នាំក្រោយនេះតទៅ៕ អត្ថបទ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
