អូឡាំពិក៖ អត្តពលិកកីឡាហែលទឹកកម្ពុជា ២រូបរួមមានកីឡាករ ហែម ប៊ុច និងកីឡាការិនី ឃឿន ប៊ុនពេជ្រមរកត នឹងត្រូវប្រកួតកីឡាអូឡាំពិកទីក្រុងតូក្យូឆ្នាំ២០២០ នៅថ្ងៃទី៣០ ខែកក្កដាស្អែកនេះហើយនៅមជ្ឈមណ្ឌលកីឡាហែលទឹក Tokyo Aquatics Centre។
កីឡាករ-កីឡាការិនីហែលទឹកកម្ពុជាទាំង ២រូបនឹងត្រូវប្រកួតវិញ្ញាសាហែល ៥០ម៉ែត្រសេរីដូចគ្នានៅវេលាម៉ោង ១៩៖០០នាទីល្ងាចនៅជប៉ុនត្រូវនឹងម៉ោង ៥៖០០នាទីល្ងាចម៉ោងនៅកម្ពុជា ។ មុនការប្រកួតមកដល់ ហែម ប៊ុច និង ឃឿន ប៊ុនពេជ្រមរកត បានធ្វើការហ្វឹកហាត់រៀងរាល់ថ្ងៃនៅទីលានប្រកួត ជាមួយអត្តពលិកចម្រុះជាតិសាសន៍ ហើយពួកគេបានបញ្ជាក់ពីការត្រៀមខ្លួនយ៉ាងល្អ ដើម្បីត្រៀមការប្រកួតដ៏សំខាន់នេះ ពិសេសគឺការតាំងចិត្តបំបែកសិទ្ធិផលចាស់របស់ខ្លួនតែម្ដង។ ដោយឡែកអត្តពលិកកម្ពុជា ១រូបទៀតគឺកីឡាអត្តពលកម្ម ប៉ែន សុគង់ នឹងត្រូវប្រកួតនៅថ្ងៃបន្ទាប់ ពោលគឺនៅថ្ងៃទី៣១ ខែកក្កដាចុងសប្ដាហ៍នេះនៅពហុកីឡដ្ឋាន Olympic Stadium។ សុគង់ នឹងត្រូវប្រកួតវិញ្ញាសារត់ល្បឿនចម្ងាយ ១០០ម៉ែត្រនាវេលាម៉ោង ១១៖៣០នាទីព្រឹកត្រូវនឹងម៉ោង ៩៖៣០នាទីព្រឹកម៉ោងនៅកម្ពុជា។
គួរដឹងថា កម្ពុជាបានបញ្ជូនអត្តពលិកចូលរួម ៣រូបប៉ុណ្ណោះចូលរួមប្រកួតកីឡាអូឡាំពិកនៅទីក្រុងតូក្យ ដែលទទួលបានសិទ្ធអនុគ្រោះពីសហព័ន្ធអន្ដរជាតិ រួមមានកីឡាហែលទឹក ២រូប និងកីឡាអត្តពលកម្ម ១រូប។ ប៉ុន្ដែកន្លងមកកម្ពុជាក៏បានបញ្ជូនអត្តពលិក ២ប្រភេទកីឡាទៀតចូលរួមប្រកួតជម្រុះដើម្បីប្រជែងកៅអីអូឡាំពិករដូវក្ដៅនេះដែរ តែបានធ្លាក់ត្រឹមវគ្គជម្រុះរួមមានកីឡាតេក្វាន់ដូ (WT) និងកីឡាគុនដាវ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
