កំពង់ឆ្នាំង៖ នៅព្រឹកថ្ងៃទី២៦ ខែមេសា ឆ្នាំ២០២៤នេះ ក្នុងសាលាខេត្តកំពង់ឆ្នាំង សហភាពសហព័ន្ធយុវជនកម្ពុជាខេត្ត ដឹកនាំដោយឯកឧត្តម ហេង ពិទូ ប្រធានសហភាពសហព័ន្ធយុវជនកម្ពុជាខេត្តកំពង់ឆ្នាំង បានដឹកនាំសមាជិកសមាជិកា ស.ស.យ.ក ក្នុងខេត្ត ដោយមានការនិមន្តពីព្រះសង្ឃចំនួន១៥២អង្គនាក់ ចូលរួមបរិច្ចាគឈាមដោយស្ម័គ្រចិត្ត ក្នុងគោលបំណង “យុវជនរួមគ្នាជួយសង្គ្រោះជីវិត” ដើម្បីជួយសង្គ្រោះជនរងគ្រោះ ដែលកំពុងត្រូវការឈាមជាចាំបាច់ក្នុងការសង្គ្រោះអាយុជីវិតរបស់ពួកគាត់នៅទូទាំងប្រទេស។

ឯកឧត្តម ហេង ពិទូ ប្រធានសហភាពសហព័ន្ធយុវជនកម្ពុជាខេត្តកំពង់ឆ្នាំងបានថ្លែងថា៖ ឈាមមានសារៈសំខាន់ណាស់ដែលយើងគ្រប់គ្នាត្រូវការ ជាពិសេសអ្នករងគ្រោះ ដែលត្រូវការឈាមជាចាំបាច់ក្នុងការសង្គ្រោះអាយុជីវិត ដូចនេះយើងទាំងអស់គ្នាជា ស.ស.យ.ក ខេត្តកំពង់ឆ្នាំង រួមនិងព្រះសង្ឃ បានរួមគ្នាដោយស្ម័គចិត្តបរិចាគឈាមដើម្បីសង្គ្រោះអាយុជីវិតជនរងគ្រោះនៅទូទាំងប្រទេស។ កម្មវិធីបរិច្ចាគឈាមនាពេលនេះ គឺជាការលើកទឹកចិត្តដល់យុវជនជនដែលស្ម័គ្រចិត្តបរិច្ចាគឈាម បានយល់ដឹងអំពីការធ្វើអំពើល្អដោយទឹកចិត្តបរិសុទ្ធ ដើម្បីជួយដល់អ្នកជំងឺកំពុងរង់ចាំការជួយសង្គ្រោះអាយុជីវិតដែលពួកគាត់ត្រូវការឈាមជាចាំបាច់ ពីក្រុមវេជ្ជបណ្ឌិតជំនាញគ្រប់ឯកទេស មន្ត្រីថែទាំទាំងឡាយ ដែលវាជាឱសថដ៏មានតម្លៃឧត្តុង្គឧត្តមបំផុតលោកនេះពុំមានមន្ទីរពិសោធន៍ណាអាចផលិតឈាមបាននៅឡើយទេ។

ឯកឧត្តមក្នុងនាមប្រធានសហភាពសហព័ន្ធយុវជនកម្ពុជាខេត្តកំពង់ឆ្នាំង ពិតជាមានមោទកភាពណាស់ បងប្អូនជាសមាជឹកសហភាពសហព័ន្ធយុវជនកម្ពុជាទាំង៨ក្រុងស្រុកចំនួន១៥២នាក់ បានសហការជាមួយមជ្ឈមណ្ឌលជាតិផ្ដល់ឈាម នៃក្រសួងសុខាភិបាល ផ្តួចផ្តើមបំផុសស្មារតីឱ្យមានការចូលរួមស្ម័គ្រចិត្តបរិច្ចាគឈាមក្នុងវេលានេះ។ សូមលើកទឹកចិត្តបងប្អូនទាំងអស់ដែលមានវត្តមាននៅទីនេះ និងតាមមន្ទីរ អង្គភាពនានាជុំវិញខេត្ត ដែលបានយល់ច្បាស់អំពីអត្ថន័យនៃការបរិច្ចាគឈាម សូមបន្តចូលរួមចំណែកក្នុងការបរិច្ចាគឈាមឱ្យក្លាយជាទម្លាប់ដ៏ប្រពៃយ៉ាងផុលផុសបន្ថែមទៀត ៕ ដោយ ៖ កាំង ហុងវាស្នា