អ្នកនាំពាក្យសេវាពន្ធនាគារបាននិយាយកាលពីថ្ងៃព្រហស្បតិ៍ (២៥ មេសា) ថា យ៉ាងហោចណាស់អ្នកទោសចំនួន ១១៨ នាក់បានរត់គេចខ្លួនពីពន្ធនាគារ បន្ទាប់ពីមានភ្លៀងធ្លាក់ខ្លាំងកាលពីយប់ថ្ងៃពុធ បានធ្វើឱ្យខូចខាតដល់មណ្ឌលឃុំខ្លួននៅក្នុងទីក្រុង ស៊ូលេចា (Suleja) ក្បែររដ្ឋធានីរបស់ប្រទេសនីហ៊្សេរីយ៉ា។

អ្នកនាំពាក្យ លោក អាដាមូ ឌូហ្សា (Adamu Duza) បាននិយាយនៅក្នុងសេចក្តីថ្លែងការណ៍មួយថា ភ្លៀងធ្លាក់ដែលអូសបន្លាយជាច្រើនម៉ោងបានបំផ្លាញផ្នែកខ្លះនៃពន្ធនាគារសន្តិសុខកម្រិតមធ្យម រួមទាំងជញ្ជាំងបរិវេណមណ្ឌលនោះ និងអគារជុំវិញផងដែរ។

ភ្នាក់ងារសេវាកម្មកំពុងតាមប្រមាញ់ជនរត់គេចខ្លួន ហើយរហូតមកដល់ពេលនេះបានចាប់ខ្លួនពួកគេបានវិញចំនួន ១០ នាក់ដោយមានជំនួយពីភ្នាក់ងារសន្តិសុខផ្សេងទៀត។ លោក ឌូហ្សា មិនបានផ្តល់ព័ត៌មានលម្អិតអំពីអត្តសញ្ញាណ ឬទំនាក់ទំនងរបស់អ្នកទោសដែលរត់គេចខ្លួននោះទេ ប៉ុន្តែកាលពីមុន សមាជិកនៃក្រុមបះបោរអ៊ីស្លាម បូកូ ហារ៉ាម (Boko Haram) ត្រូវបានឃុំឃាំងនៅក្នុងពន្ធនាគារក្នុងទីក្រុង ស៊ូលេចា នេះ។

ការហែកពន្ធនាគារបានក្លាយជាកង្វល់សន្តិសុខដ៏សំខាន់មួយនៅក្នុងប្រទេសនីហ៊្សេរីយ៉ា ដែលភាពចង្អៀតណែន កង្វះថវិកា និងវិធានការសន្តិសុខដ៏ផុយស្រួយ បានបង្កើតលក្ខខណ្ឌអំណោយផលសម្រាប់ការរត់គេចខ្លួន។ អ្នកទោសរាប់ពាន់នាក់បានរត់គេចខ្លួនក្នុងរយៈពេលប៉ុន្មានឆ្នាំថ្មីៗនេះ ដោយសារហេដ្ឋារចនាសម្ព័ន្ធខ្សោយ និងការវាយប្រហារដោយពួកសកម្មប្រយុទ្ធ៕