កម្មវិធីវីដេអូខ្លី ទីកតុក (TikTok) កំពុងប្រឈមនឹងវិបត្តិអត្ថិភាពនៅអាមេរិក។ ប្រសិនបើក្រុមហ៊ុនមេចិនរបស់ខ្លួនបរាជ័យក្នុងការលក់កម្មវិធីនេះនៅឆ្នាំក្រោយ ឬរយៈពេលក្រោយពីនោះ កម្មវិធីវីដេអូខ្លីកម្សាន្តមួយនេះអាចត្រូវបានហាមឃាត់នៅក្នុងទីផ្សារដ៏ធំបំផុតរបស់ខ្លួន។
នេះមិនត្រឹមតែអាចបង្កផលប៉ះពាល់ដ៏ធំមួយផ្សេងទៀតចំពោះមហិច្ឆតាបច្ចេកវិទ្យារបស់ប្រទេសចិនប៉ុណ្ណោះទេ តែក៏នឹងធ្វើឱ្យកាន់តែស៊ីជម្រៅថែមទៀតនូវភាពតានតឹង និងការបែងចែករវាងពិភពឌីជីថលពីរ ដែលផ្តោតលើប្រទេសមហាអំណាចសេដ្ឋកិច្ចដែលជាគូប្រជែងគឺសហរដ្ឋអាមេរិក និងប្រទេសចិន។
លោកប្រធានាធិបតី ចូ បៃដិន (Joe Biden) បានចុះហត្ថលេខាលើកញ្ចប់ជំនួយបរទេសដែលរួមបញ្ចូលសំណើច្បាប់ដែលនឹងហាមឃាត់ TikTok ប្រសិនបើក្រុមហ៊ុនមេដែលមានមូលដ្ឋាននៅប្រទេសចិន បៃឌែនស៍ (ByteDance) បរាជ័យក្នុងការលក់កម្មវិធីនេះក្នុងរយៈពេលមួយឆ្នាំ។
កន្លងមករដ្ឋាភិបាលក្រុងប៉េកាំង បាននិយាយថាខ្លួនប្រឆាំងយ៉ាងខ្លាំងចំពោះការលក់ TikTok ដោយបង្ខំ ហើយបានកែប្រែច្បាប់គ្រប់គ្រងការនាំចេញរបស់ខ្លួនដើម្បីផ្តល់អំណាចក្នុងការទប់ស្កាត់ការលក់នៅលើមូលដ្ឋានសន្តិសុខជាតិ។ នេះទុកជម្រើសមួយចំនួនសម្រាប់ក្រុមហ៊ុន បៃឌែនស៍ ដើម្បីធានាអនាគត TikTok នៅសហរដ្ឋអាមេរិក ដែលជាទីផ្សារដ៏ធំបំផុតរបស់ខ្លួនដែលមានអ្នកប្រើប្រាស់ ១៧០ លាននាក់។
ការហាមប្រាមលើ TikTok នេះក៏ទំនងជានឹងពន្លឿនការផ្លាស់ប្តូរដែលកំពុងបំបែកទិដ្ឋភាពបច្ចេកវិទ្យារបស់ពិភពលោកជាពីរប្លុក ដោយមួយផ្តោតលើសហរដ្ឋអាមេរិក និងមួយទៀតចាប់យកបច្ចេកវិទ្យាពីប្រទេសចិន៕